ԵՐԵՎԱՆ, 6 հուլիսի — Sputnik. «Բարգավաճ Հայաստան» կուսակցության նախագահ Գագիկ Ծառուկյանի թիկնազորի պետ Էդուարդ Բաբայանի կալանավորումից հետո ծառուկյանականները կսպասեն դեպքերի հետագա ընթացքին։
«Այս պահին որևէ մեկնաբանություն մենք չենք անելու: Հույս ունեմ` գործընթացները գտնվում են բացառապես իրավական տիրույթում: Մենք կսպասենք հետագա ընթացքին»,- այսօր լրագրողներին հայտնեց ԱԺ «Ծառուկյան» խմբակցության պատգամավոր Նաիրա Զոհրաբյանը:
Նա նաև ավելացրեց` տուժողը հայտարարել է, որ իրեն չեն հարվածել:
«Տուժողը հստակ հայտարարեց, որ որևէ հարված չի եղել ո՛չ Էդուարդ Բաբայանի, ո՛չ որևէ այլ անձի կողմից: Խնդրում եմ հիմք ընդունել տուժողի հայտարարությունը»,- ասաց Զոհրաբյանը:
Նույն մեկնաբանությունը տվեց նաև «Ծառուկյան» խմբակցության պատգամավոր Սերգեյ Բագրատյանը:
«Մանավանդ, երբ հանրային ընկալման մեջ այս պահին իրավական համակարգը համարվում է իդեալական, վստահության արժանի, պետք չէ գնահատականներ տալ, պետք է սպասել դեպքերի ընթացքին»,- ասաց նա:
Ինչ վերաբերում է Ծառուկյանի թիկնազորի պետին, Բագրատյանը նշեց, որ նրան ճանաչում է որպես զուսպ, չխոսկան անձնավորության և հավելեց` ընդհանրապես մարզիկները զուսպ են:
Սերգեյ Բագրատյանը հայտնեց, որ միջադեպի շուրջ Գագիկ Ծառուկյանի հետ չի խոսել, նրա գնահատականին ու դիրքորոշմանը ծանոթ չէ:
Գագիկ Ծառուկյանի թիկնազորի պետը կալանավորվել է երեկ գիշեր` ժամը 1-ի սահմաններում: ՀՀ ոստիկանության պետական պահպանության գլխավոր վարչության աշխատակից, Հայաստանի օլիմպիական կոմիտեի նախագահի օգնական Էդուարդ Բաբայանին մեղադրանք է առաջադրվել ՀՀ քրեական օրենսգրքի համապատասխան հոդվածով նախատեսված այն հանցավոր արարքի կատարման համար, որ վերջինս խմբի կազմում հարվածներ է հասցրել և դիտավորությամբ կյանքին վտանգ սպառնացող ծանր վնաս հասցրել Վյաչեսլավ Հարությունովին:
