ԵՐԵՎԱՆ, 8 հուլիսի — Sputnik. Վարդավառի ուրախ տոնին ջրոցի խաղացող երեխաների կողմից ջրվելուց զերծ չեն մնացել նաև պաշտոնատար անձինք։ Այս մասին տեղեկանում ենք ֆեյսբուքյան գրառումներից։
Թուրքագետ, Սփյուռքի նախարարի խորհրդական Գևորգ Պետրոսյանն ուրախ տեսանյութ է հրապարկել, որտեղ պարզ երևում է, թե ինչպես են երեխաները ոտքից գլուխ ջրում շենքից նոր դուրս եկած Սփյուռքի նախարար Մխիթար Հայրապետյանին։
«Փոքրիկ դիվերսանտները գրոհում են սփյուռքի նախարար Մխիթար Հայրապետյանին կամ Վարդավառը Նոր Նորքում: Ի դեպ, նախարարի «շնորհիվ» մենք ջրից չոր դուրս եկանք)»,–գրել է Գևորգ Պետրոսյանը։
Էջմիածնի նորանշանակ քաղաքապետն էլ ֆեյսբուքյան իր պաշտոնական էջում իրենց քաղաքում անցկացված ուրախ Վարդավառից նկարներ է հրապարկել, որոնց մեջ նաև իր` լավ թրջված նկարն է ու տեղեկացրել, որ Վարդավառն իրենց քաղաքում շատ ուրախ է անցել: «Քաղաքապետին էլ մի լաաավ ջրեցին»,–գրել է Գրիգորյանը։
Հիշեցնենք, որ այսօր` հուլիսի 8–ին, Հայ առաքելական եկեղեցին տոնում է Վարդավառը կամ Քրիստոսի պայծառակերպության տոնը։ Այն մեր եկեղեցու 5 տաղավար տոներից մեկն է։
Վարդավառը նախաքրիստոնեկան տոն է: Այն նվիրված էր Հայոց Աստղիկ դիցուհուն: Տոնի ժողովրդական Վարդավառ անունը բացատրվում է որպես հնդեվրոպական «var-ջուր և arr- ցողել, սրսկել» անունների համակցում, այսինքն «ջուր ցողելու», «ջուր լցնելու» տոն։
Քրիստոնեության ընդունումից հետո ժողովրդի կողմից շատ սիրված տոնը փոխակերպվեց քրիստոնեականի`Հիսուս Քրիստոսի պայծառակերպության տոնի, որը Հայ Եկեղեցու հինգ տաղավար տոներից երրորդն է: «Մեր Տեր Հիսուս Քրիստոս, համաձայն Ավետարանի, Ս. Պետրոս, Ս. Հակոբոս և Ս. Հովհաննես առաքյալների հետ բարձրանում է Թաբոր լեռն`աղոթելու: Աղոթքի պահին Հիսուս նրանց առաջ պայծառակերպվում է։
