ԵՐԵՎԱՆ, 9 հուլիսի — Sputnik. Հայ զորակոչիկները բուժզննում անցնելիս պետք է կրկնակի «զտում» հաղթահարեն` բժշկական փորձաքննություն, ինչպես նաև հանձնաժողովի զննում կենտրոնական հավաքակայանում, երկուշաբթի լրագրողներին ասաց Հայաստանի պաշտպանության նախարարության ռազմաբժշկական վարչության պետ Գայանե Հովհաննիսյանը։
Նրա խոսքով` սուր վիճակներ բացահայտելու դեպքում զորակոչիկներն անհրաժեշտ բուժում են ստանում և միայն դրանից հետո տեղաբաշխվում են զորամասերում։
«Հանձնաժողովն ուսումնասիրում է զորակոչիկների վիճակն արդեն նրանց անցած ստուգումներից հետո։ Հանձնաժողովը լրացուցիչ ֆիլտր է», – նշեց նա։
Հովհաննիսյանը նշեց, որ ծառայության ամբողջ ընթացքում զինվորները գտնվում են ռազմաբժշկական վարչության ուշադրության կենտրոնում։ Պրոֆիլակտիկ աշխատանքներից բացի անհրաժեշտության դեպքում (օրինակ` ծնողների դիմումների հիման վրա) անցկացվում են զինծառայողների առողջական վիճակի առանձին ստուգումներ, նշանակվում է բուժման կուրս և այլն։
«Առաջին բուժօգնությունը կազմակերպվում է զորամասերի բուժկետերում։ Մինչև 7 օր կարելի է բուժել այնտեղ։ Եթե զինծառայողի վիճակը վատանում է կամ կասկածներ կան, որ ամեն ինչ գնում է դրան, նրանց տեղափոխում են կայազորային հոսպիտալ, այնուհետև` կենտրոնական ռազմական հոսպիտալ` մասնագիտացված բուժում անցնելու համար», – ասաց նա։
Պատասխանելով այն հարցին, թե այսօր ինչ առաջնահերթություններ է իր առջև դնում Հայաստանի պաշտպանության նախարարության ռազմաբժշկական վարչությունը` Հովհաննիսյանը նշեց` հիվանդությունների կանխարգելումը և զինծառայողների սանիտարահիգիենիկ պայմանների բարելավումը։
Մեկնաբանելով ծառայություն անցնելու ընթացքում զինծառայողների հնարավոր մահը` պայմանավորված տարբեր հիվանդություններով` Հովհաննիսյանը հայտարարեց, որ դա հնարավոր է միայն առողջական վիճակի կտրուկ սրման և վատթարացման դեպքում։