ԵՐԵՎԱՆ, 10 հուլիսի — Sputnik. ՀՀ ոստիկանապետ Վալերի Օսիպյանի հրամանով ժամանակավորապես կասեցվել են նախկին ոստիկանապետ Վլադիմիր Գասպարյանի եղբորորդու՝ Սերգեյ Գասպարյանի պարտականությունները: Այս մասին այսօր՝ հուլիսի 10-ին, լրագրողների հետ զրույցում ասել է ոստիկանապետ Վալերի Օսիպյանը։
Նա հայտնել է նաև, որ Վարդավառի օրը Գասպարյանի եղբոր մասնակցությամբ տեղի ունեցած գործի նյութերը ուղարկվել են Հատուկ քննչական ծառայություն։
Հարցին` հնարավո՞ր է նախկին ոստիկանապետի եղբայրը խուսափի պատասխանատվությունից, Օսիպյանը պատասխանել է. «Այսօր այն իրավիճակը չէ, որ որևէ մեկը կարող է խուսափել պատասխանատվությունից, ով ուզում է լինի ՀՀ-ում, այդ թվում՝ ես, լինելով ոստիկանապետ, եթե որևէ հարցում ես այնպես չեմ գործել, ես ինքս պատասխանատվություն եմ կրելու»։
Նա նաև ավելացրել է` չեմ կարծում, որ Վլադիմիր Գասպարյանը փորձի միջամտել հարցին։
ԶԼՄ-ների տեղեկությունների համաձայն` նախկին ոստիկանապետ Վլադիմիր Գասպարյանի եղբայր Կարեն Գասպարյանն ու նրա որդին հուլիսի 8-ին բռնություն են գործադրել 13-ամյա աղջկա հանդեպ, ծեծի ենթարկել նրա հորը՝ պատճառելով մարմնական վնասվածքներ:
