ԵՐԵՎԱՆ, 12 հուլիսի — Sputnik. Երևանի ավագանու արտահերթ նիստն այսօր պետք է հստակություն մտցնի, թե ինչ է լինելու Երևանի քաղաքապետ Տարոն Մարգարյանի հրաժարականից հետո։
Նիստը վարող առաջին փոխքաղաքապետ, ՀՀԿ խմբակցության անդամ Կամո Արեյանն առաջարկեց Երևանի քաղաքապետի ընտրություն անցկացնել հուլիսի 16-ին հրավիրվող նիստի ընթացքում։
«Ելք» խմբակցությունը շուտափույթ ընտրություններին դեմ է։ Խմբակցության ղեկավար Դավիթ Խաժակյանը առաջարկեց քաղաքապետի արտահերթ ընտրության նիստը հետաձգել 1 ամսով ու նշանակել օգոստոսի 8-ին։
«Ձեր նշածով արտահերթ ընտրություններն այդքան շուտ են լինելու, որ ընտրական գործընթացի կազմակերպման տեսանկյունից խնդիրներ են առաջանալու։ Եթե հուլիսի 16-ին քաղաքապետ չընտրվի, Երևանի ավագանու արտահերթ ընտրությունները օգոստոսին են լինելու, իսկ այդ ժամանակ պայմանները չափազանց դժվար են լինելու՝ քարոզարշավների կազմակերպման, տպարանների, դպրոցների հետ կապված խնդիրներ կարող են լինել։ Եվ այստեղ ամենամեծ վնասն այն է, որ ընտրությունների խոչընդոտները հաղթահարվելու են լրացուցիչ և մեծ գումարների հատկացմամբ։ Սա սաբոտաժ է պետության դեմ, ոչ թե «Ելքի» –ի»,- ասաց Խաժակյանը։
Կամո Արեյանն ընդունեց «Ելք» խմբակցության առաջարկությունը։ Բայց մինչ ավագանին կքվեարկեր «Ելք»–ի ու ՀՀԿ–ի առաջարկները, «Ելք» խմբակցությունը 15 րոպե ընդմիջում պահանջեց։
Երևանի ավագանին քվեարկությամբ որոշեց, որ քաղաքապետ կընտրեն հուլիսի 16–ին։ Քվեարկությանը մասնակցեց 34 ավագանու անդամ, որոնցից 11–ը դեմ էր, 1-ը` ձեռնպահ։
Հիշեցնենք, որ Երևանի քաղաքապետ Տարոն Մարգարյանը հուլիսի 9-ին հրաժարական է ներկայացրել։
Ըստ Երևանի մասին օրենքի՝ քաղաքապետի պաշտոնը թափուր մնալուց հետո երրորդ աշխատանքային օրը օրենքի ուժով հրավիրվում է ավագանու նիստ, որում որոշվում է քաղաքապետի արտահերթ ընտրության օրը։ Արտահերթ ընտրությունների ժամանակ քաղաքապետի թեկնածուներ առաջադրելու իրավունք ունեն բոլոր խմբակցությունները: Նոր քաղաքապետը պետք է ընտրվի առավելագույնը մեկ ամսվա ընթացքում, այլապես ավագանին ցրվում է ու նշանակվում են ավագանու նոր` արտահերթ ընտրություններ։
