ԵՐԵՎԱՆ, 12 հուլիսի — Sputnik. STR ակումբը հուլիսի 15-ին Վազգեն Սարգսյանի անվան մարզադաշտի մոտակայքում դրագռեյսինգի մրցումներ և դրիֆտշոու կանցկացնի։ Այս մասին այսօր Sputnik Արմենիա մամուլի կենտրոնում ասաց ակումբի նախագահ Արսեն Մանուկյանը։
Թեև Հայաստանում մրցարշավորդների մասնագիտական դպրոց ու ավտոդրոմ չկա, բայց Մանուկյանը վստահեցնում է, որ դրիֆթինգի տասը մասնակցի պրոֆեսիոնալիզմը հաստատ կզարմացնի հայ հանդիսատեսին։ Կազմակերպիչները խոստանում են, որ աղջիկ մրցարշավորդների, թյունինգ արած մեքենաների ու մոտոմրցարշավորդների մասնակցությամբ անմոռանալի շոու է լինելու։ Մանուկյանի խոսքով` հայ վարորդները գիտեն` ինչպես վարվել մեքենայի հետ ու հաջողացնում են մեքենայի կափարիչի տակ միաժամանակ 300 «ձի» ու պարաշյուտ տեղավորել։ Վերջինը` ուղիղ իմաստով։
«Առաջին անգամ դրիֆտ-տաքսի շոու կանցկացնենք։ Հանդիսատեսի շարքերում գտնվող բախտավորները ադրենալինով լիցքավորվելու հնարավորություն կստանան և կշրջեն մրցարշավային մեքենայով։ Այդ բախտավորները կորոշվեն վիճակահանության արդյունքում», — Sputnik Արմենիայի թղթակցի հետ զրույցում ասաց Մանուկյանը։
Մրցարշավորդը նշեց, որ արցախցիներն էլ կմասնակցեն հայ ավտոսիրահարների «թրիլերին»։ Արդեն հուլիսի 26-ին 50 մրցարշավորդ, որոնք մասնակցում են դրագռեյսինգին, Ստեփանակերտ կմեկնեն, որտեղ թյունինգ արած մեքենաների ցուցադրություն ու մանկական եռամարտի մրցումներ կանցկացնեն, և այս ամենը կավարտվի դրագռեյսինգով։
Ստեփանակերտի օդանավակայանում ադրենալին-շոու կանցկացվի և «կայրեն» եռագույնով ներկված անվադողերը։ Մանուկյանը նշեց, որ միջոցառումներից ստացած բոլոր գումարները փոխանցելու են Ստեփանակերտի մանկատանը։
