ԵՐԵՎԱՆ, 16 հուլիսի — Sputnik. Հուլիսի 16-ին Շիրակի մարզի ընդհանուր իրավասության առաջին ատյանի դատարանում կայացած նիստի ժամանակ, նիստը նախագահող դատավոր Վահե Միսակյանը, հաշվի առնելով մի շարք հանգամանքներ, այդ թվում՝ դատապարտյալի առողջական վիճակը, ինչպես նաև Արթիկ քրեակատարողական հիմնարկում վերջինիս ցուցաբերած դրական վարքագիծը, որոշում կայացրեց բավարարել Արարատ Խանդոյանին պատժի կրումից վաղաժամկետ ազատ արձակելու միջնորդությունը։
Միջնորդությունը ներկայացրել էր փաստաբան Արա Ղարագյոզյանը։
Դատարանը որոշեց Արթիկ քրեակատարողական հիմնարկի դատապարտյալ Արարատ Խանդոյանին պայմանական վաղաժամկետ արձակել Երևանի Կենտրոն և Նորք-Մարաշ առաջին ատյանի դատարանի 17.06.2017 թվականի պատժի մնացած մասի (1 տարի 6 ամիս 5 օր) կրումից: Արարատ Խանդոյանի նկատմամբ սահմանել փորձաշրջան պատիժը չկրած մասի չափով և վերահսկողությունը դնել ՀՀ ԱՆ համապատասխան ծառայություն վրա: Արարատ Խանդոյանին ազատ արձակել նիստերի դահլիճում:
Արարատ Խանդոյանը «Սասնա ծռեր» խմբի անդամ Արայիկ Խանդոյանի («Միայնակ գայլ») եղբայրն է։
Նա բերման էր ենթարկվել 2016 թվականի հուլիսի 20-ին ՊՊԾ գնդի գրավման դեպքերից հետո: Նրան մեղադրանք էր առաջադրվել ՀՀ քրեական օրենսգրքի 225-րդ հոդվածով՝ զանգվածային անկարգություններին մասնակցելը, որում եւ մեղավոր էր ճանաչվել, դատապարտվել երեքուկես տարվա ազատազրկման:
Արարատ Խանդոյանը պատիժը կրում էր Արթիկ քրեակատարողական հիմնարկում: Ինչպես դատական նիստի մեկնարկին, այնպես էլ դատավորի՝ որոշումն ընթերցելուց հետո Արարատ Խանդոյանին հարազատներն ու համակիրները դիմավորեցին ծափերով:
