ԵՐԵՎԱՆ, 19 հուլիսի — Sputnik. ՀՀ վարչապետին առընթեր գործող ընտրական օրենսդրության բարեփոխումների հանձնաժողովի քարտուղար Դանիել Իոաննիսյանը ԱԺ փոխնախագահ Արփինե Հովհաննիսյանից պահանջել է հրապարակային ներողություն խնդրել կամ պարզաբանում ներկայացնել իր հասցեին արած վիրավորական արտահայտության համար։
Այս մասին Իոննիսյանը գրել է ֆեյսբուքյան էջում` որպես ապացույց ներկայացնելով ընտրական օրենսդրության բարեփոխումների աշխատանքային խմբի նիստի ուղիղ հեռարձակման տեսանյութը, որտեղ պարզորոշ լսվում է, որ Արփինե Հովհաննիսյանն ասում է. «Էս մտավոր հետամնացի հետ ի՞նչ քննարկենք»:
«Ազգային Ժողովի փոխնախագահը երևի չէր պատկերացնում, որ ուղիղ եթերում է: Բայց սյուռն այն է, որ այդ հանդիպումից հետո Արփինեն ինձ շատ ընկերական ոճով պատմում էր, թե ինչ լավ է վերաբերվում ինձ»,– գրում է Իոաննիսյանը։
ՀՀԿ–ական պատգամավորն Իոաննիսյանին պատասխանել է ֆեյսբուքյան իր գրառմամբ` նշելով, որ իր արտահայտությունը ճիշտ չի ընկալվել։ (Նշված հատվածը` 1։25։40–ից)
«Եթե հասկացվել է անձնավորված, ցավում եմ և բնականաբար հայցում ներողամտություն։ Ավելորդ լարվածություն ստեղծելու կարիք չկա»,–գրել է նա։
Արփինե Հովհաննիսյանը նաև վստահեցրել է, որ Դանիել Իոաննիսյանի հետ լավ հարաբերություններ ունի։