11:39 17 սեպտեմբերի 2019
Ուղիղ եթեր
  • USD476.16
  • GBP592.63
  • EUR526.54
  • RUB7.43
Սևանա լիճ

Ինչո՞ւ է Սևանա լիճը կանաչել, և ո՞ւմ է վտանգ սպառնում. պարզաբանում է մասնագետը

CC BY-SA 3.0 / 23artashes / Sevan National park, Armenia
Հայաստան
Ստանալ կարճ հղումը
1113 0 0

Սևանի կապտականաչ գույնն անհանգստացրել է մասնագետներին։ Լճի որոշ հատվածներում լողալ չի կարելի, խմել` առավել ևս, վտանգված է նաև ձկան վերարտադրությունը։

ԵՐԵՎԱՆ, 25 հուլիսի — Sputnik. Սևանա լճի «ծաղկելու» պատճառը մեկը չէ, այլ մի քանիսը։ Sputnik Արմենիայի հետ զրույցում ասաց ԵՊՀ էկոլոգիայի և բնության պահպանության ամբիոնի դոցենտ, Հիդրոէկոլոգիայի և ձկնաբանության ինստիտուտի ավագ գիտաշխատող Լուսինե Համբարյանը։

Նրա խոսքով` որպես հիմանական պատճառներ նշվող շոգն ու ջերմաստիճանի բարձրացումը ամենաակնհայտ պատճառներն են, բայց հետազոտությունները ցույց են տալիս, որ պատճառների թվում է լճում ֆոսֆորի պարունակության ավելացումը, ինչպես նաև ջրի մակարդակի տատանումները։

«Մենք հայտնաբերեցինք, որ այս տարի լճի ափամերձ տարածքներում տարածվել է կապտականաչ ջրիմուռների անաբենա ցեղատեսակը, որը համարվում է տոքսիկ։ Լճի նաև երկրորդային աղտոտման վտանգ կա, որովհետև այս տեսակը տեսանելի չէ, բայց ունի հատուկ բջիջներ, որով ֆիքսում է մթնոլորտային ազոտը։ Այսինքն` ծաղկման ավարտից հետո, քայքայվելու ընթացքում այն լրացուցիչ ազոտի պարունակություն կհաղորդի ջրին»,- ասաց Համբարյանը` հավելելով, որ այդ ամենի հետևանքով լճի ջուրն ավելի կպղտորվի։

Ինչ վերաբերում է ջրի ներկա կապտականաչ գույնին, մասնագետի խոսքով, այն մեկ-երկու շաբաթվա ընթացքում կվերանա, բայց փոխարենը ջրում կպահպանվի ազոտի մեծ քանակությունը։

Իսկ եթե շոգը չնահանջի և պահպանվի նաև աշնանը, լիճը կարող է «ծաղկել» նաև երկրորդ անգամ։ Երկարատև գործընթացը կազդի նաև ձկան և ձկնկիթի զարգացման վրա։ Լճից ջուր խմող տնային կենդանիների, լճում լողացող մարդկանց մոտ կարող են առաջանալ աղիների խանգարումներ, մաշկային ցան։

Ի դեպ, այսօր նաև առողջապահության նախարարությունն է հայտարարել, որ ջրիմուռներով առատ ափերում լողալը վտանգավոր է առողջության համար։

Նման ջրում լողալու դեպքում մարդու մոտ կարող են ի հայտ գալ ասթմա, աչքերի գրգռվածություն, ցան, ալերգիկ ռեակցիա, իսկ ջուր կուլ տալու դեպքում` ստամոքսի ցավ, սրտխառնոց, փսխում, փորլուծություն, ջերմություն, կոկորդի ցավ, գլխացավ, մկանային և հոդերի ցավ, բլիթներ բերանի խոռոչում, լյարդի հետ կապված խնդիրներ։

Մասնագետները նշում են նաև, որ ջրային ավազանների ծաղկումը կամ դրանում վտանգավոր ջրիմուռների առաջացումը ոչ միայն Հայաստանի, այլև համաշխարհային խնդիր է, որը հանգեցնում է քաղցրահամ ջրերի որակի վատթարացման։ Իսկ դրա հիմնական պատճառն աշխարհում համարվում է գլոբալ ջերմացումը, որից անմասն չէ նաև Հայաստանը։

Ի դեպ, ԱԻՆ «Հիդրոմետ» ծառայության կանխատեսումներով, առանց տեղումների եղանակն ու 41 աստիճան շոգը կպահպանվի մինչև այս շաբաթվա վերջ։

Գլխավոր թեմաներ