ԵՐԵՎԱՆ, 26 հուլիսի — Sputnik. Պետեկամուտների կոմիտեի նախագահ Դավիթ Անանյանն այսօր կառավարությունում լրագրողներին պարզաբանեց երեկ Բագրատաշենի մաքսակետում գրանցված միջադեպը, որի տեսանյութը մեծ տարածում է ստացել համացանցում։
Դավիթ Անանյանը հերքեց լուրերն այն մասին, որ լվացքի մեքենան մաքսազերծելու դիմաց քաղաքացուց 100 դոլար գումար են պահանջել։
«Անձին ասում են՝ օրենսդրությունն այնպիսին է, որ պետք է մաքսազերծել, որևէ 100 դոլարի մասին խոսք չի եղել, կա տեսաձայնագրությունը: Մենք հայտարարում ենք, որ ցանկացած պարագայում, երբ օրենսդրությամբ սահմանված է, որ պետք է մաքսային ձևակերպում կատարենք, մենք մեր սուրբ պարտականությունն ենք կատարում: Եթե անձը որոշում է, որ ինքը պետք է PR ակցիա իրականացնի, իր լվացքի մեքենան տա, ջարդուփշուր անի, ի՞նչ պետք է անեինք, արգելեի՞նք, որ նա նկարեր ու համացանց գցեր»,- ի պատասխան լրագրողների հարցերի, ասաց ՊԵԿ նախագահը։
Անանյանը նշեց նաև` մաքսավորների աշխատանքի վերաբերյալ դժգոհությունները միշտ չէ, որ արդարացված ու փաստարկված են։ Իսկ հնարավոր դժգոհությունների ալիքից ՊԵԿ-ը չի վախենում։
«Մենք, կարծում եմ, բունտերով չպիտի շարժվենք, այլ օրենքի տառով: Եթե օրենսդրությունը լավը չէ, պետք է փոխել: Կառավարությունը հայտարարեց, որ սեպտեմբերին փոփոխությունների փաթեթով գնալու է ԱԺ: Մինչև այդ փաթեթը կյանքի կկոչվի, մենք, որպես ՊԵԿ, վարչարարություն իրականացնող մարմին, պարտավոր ենք իրականացնել օրենքի տառը»,- ասաց նա։
Ի դեպ, մինչ այդ ՊԵԿ-ն արդեն հայտարարություն էր տարածել` բացահայտելով լվացքի մեքենա ջարդող անձի անուն-ազգանունը։ Ըստ ՊԵԿ-ի` նա 2010-2017թթ. հինգ անգամ քաղաքացիություն է փոխել, վերջին մեկ ամսվա ընթացքում սահմանահատման 13 դեպք է ունեցել:
Տեսանյութի հերոսը Երևանի բնակիչ Սեյրան Ռոլանդի Դեմիրճյանն է։ Ըստ ՊԵԿ-ի` լվացքի մեքենայի համար մաքսակետում նրանից հայտարարագիր և համապատասխան վճարներ են պահանջել։ Քաղաքացին հրաժարվել է հայտարարագրել լվացքի մեքենան և վճարում կատարել, հետո սկսել է ջարդել լվացքի մեքենան։
