ԵՐԵՎԱՆ, 26 հուլիսի — Sputnik. ՀՀ առաջին փոխվարչապետ Արարատ Միրզոյանը ստորագրել է իր մամուլի խոսնակ Կարպիս Փաշոյանի հրաժարականի դիմումը։ Այս մասին Միրզոյանը հայտնել է Facebook-ում` հիշեցնելով, որ սոցցանցում լայն քննարկման առարկա էին դարձել Կարպիս Փաշոյանի հարցազրույցներից մեկում հնչեցրած մտքերը։
«Հասկանալիորեն որևէ պաշտոնյայի խոսնակը խիստ սահմանափակ է հրապարակավ իր աշխատանքային ղեկավարի դիրքորոշումը չարտացոլող կարծիքներ հայտնելու մեջ։ Ուստիև ես ստորագրել եմ Կարպիսի՝ աշխատանքից ազատվելու դիմումը»,- գրել է Միրզոյանը։
Փոխվարչապետը նշել է նաև, որ ընդունված մոտեցումներից տարբերվող կարծիքը, հասարակության, մարդկության զարգացման հիմնական գրավականներից մեկն է։
«Այնպես որ կարծում եմ, որ Կարպիսը պիտի շարունակի իր հրապարակախոսական գործունեությունը և, ինչու՞ ոչ, հանդես գա իբրև ինքնուրույն քաղաքական գործիչ։ Եվ ես սրտանց հաջողություն եմ մաղթում նրան այս գործում»,- գրում է նա։
Հիշեցնենք` Արարատ Միրզոյանի մամուլի խոսնակ Կարպիս Փաշոյանը աշխատանքից ազատվելու դիմում էր ներկայացրել հուլիսի 17-ին։ Մինչ այդ նա իր հարցազրույցներից մեկում ապրիլյան պատերազմի հերոսների, այդ թվում՝ Արցախի հերոս Ռոբերտ Աբաջյանի մասին կարծիք էր հայտնել` նշելով. «Մանկահասակ դեմքով տղա՝ էդ պահին չի էլ հասկացել՝ ինչ է կատարվում»: Հանրության շրջանում այս արտահայտությունը խիստ քննադատության թեմա էր դարձել։