ԵՐԵՎԱՆ, 31 հուլիսի — Sputnik. Հայաստանի և Ադրբեջանի առաջնորդների միջև հանդիպման կազմակերպումն ինքնանպատակ չէ։ Այս մասին ավանդական դարձած ճեպազրույցի ժամանակ երեքշաբթի հայտնեց ՀՀ ԱԳՆ մամուլի քարտուղար Տիգրան Բալայանը։
Բալայանը հիշեցրեց, որ իր վերջին հարցազրույցներից մեկում ՀՀ վարչապետ Նիկոլ Փաշինյանը պատրաստակամություն էր հայտնել հանդիպելու Ադրբեջանի նախագահ Իլհամ Ալիևի հետ։
«Սակայն հանդիպումը ինքնանպատակ չպիտի լինի, այն պետք է բովանդակալից լինի։ Բովանդակային մասը կարող է ապահովել նոր համաձայնությունների ձեռքբերումն ու նախորդների վերահաստատումը», – ասաց ԱԳՆ ներկայացուցիչը։
Նա ավելացրեց, որ խոսքը, մասնավորապես, Վիեննայում, Սանկտ Պետերբուրգում և Ժնևում ձեռք բերված պայմանավորվածությունների մասին է։
Ինչ վերաբերում է Հայաստանի և Ադրբեջանի արտգործնախարարների հավանական հանդիպմանը, ապա հստակ պայմանավորվածություն այդ մասին դեռևս չկա։
Միևնույն ժամանակ, Բալայանը հաստատել է, որ այդ հարցը քննարկվել է Բրյուսելում. նման առաջարկ է ստացվել, սակայն ժամկետների և հանդիպման անցկացման վայրի մասին խոսելը դեռ վաղ է։
