ԵՐԵՎԱՆ, 16 օգոստոսի — Sputnik. ՀՀ ոստիկանապետ Վալերի Օսիպյանը պատճառներ չի տեսնում ոստիկանության բաժնում ԼԳԲՏ-համայնքի ներկայացուցիչների և իրավապահների միջև ծագած վեճի ծառայողական հետաքննության համար։ Այս մասին նա այսօր ասաց լրագրողներին։
Ոստիկանության հաղորդման համաձայն` օգոստոսի 14-ին, կանանց զգեստներով տղամարդիկ, վեճ հրահրելով Երևանի ոստիկանության բաժնում մարմնական վնասվածքներ են հասցրել իրավապահ մարմինների աշխատակիցներին։
«Ոստիկանությունն ի զորու է պաշտպանել ինչպես ինքն իրեն, այնպես էլ քաղաքացիներին, սակայն դա չի նշանակում, որ այն անձինք, որոնց հանդեպ հանդուրժողականություն է ցուցաբերվել, կարող են ներխուժել ոստիկանության բաժին և ագրեսիվ պահվածք դրսևորել», —ասաց նա։ Օսիպյանը հայտնեց, որ բոլոր նրանք, ովքեր կփորձեն նման բան անել, կպատժվեն օրենքի ողջ խստությամբ։
Ոստիկանապետը նաև նշեց, որ իրավապահ մարմինների աշխատակիցներին մի քանի անգամ հարվածել են, սակայն չեն ծեծել։ Նրանք իրենց հերթին անհավանական զսպվածություն են դրսևորել։
Սեռական փոքրամասնությունների ներկայացուցիչների իրավունքները պաշտպանող «Նոր սերունդ» ՀԿ-ն միջադեպի առնչությամբ դիմել է անձամբ ոստիկանապետ Վալերի Օսիպյանին` պահանջելով ջնջել միջադեպի մասին տեսահոլովակն ու ռեպորտաժը, որում երևում են ԼԳԲՏ-համայնքի ներկայացուցիչների դեմքերը։ Կազմակերպությունը պահանջել է նաև ծառայողական հետաքննություն սկսել նյութը նախապատրաստած անձանց նկատմամբ։ Բացի այդ, ակտիվիստները պաշտոնական ներողություն են ակնկալում։
ՔԿ-ն քրեական գործ է հարուցել ՀՀ ՔՕ 258-րդ հոդվածի 3-րդ մասով (խուլիգանություն, որը կատարվել է մի խումբ անձանց կամ կազմակերպված խմբի կողմից իշխանության ներկայացուցչին դիմադրություն ցույց տալով)։ Մեկ քաղաքացի ձերբակալվել է։
