ԵՐԵՎԱՆ, 17 օգոստոսի — Sputnik. Քիչ առաջ Երևան քաղաքի ընդհանուր իրավասության դատարանի դատավոր Մեսրոպ Մակյանն ազատ արձակեց «Սասնա ծռեր» խմբի անդամներ Արայիկ Խանդոյանին և Վարուժան Ավետիսյանին։
Դատարանը նրանց նկատմամբ կիրառեց ԱԺ «Ծառուկյան» խմբակցության պատգամավորներ Շաքե Իսայանի Հակոբ Նազարյանի և Նաիրա Զոհրաբյանի անձնական երաշխավորագրերը։
2016թ-ի հուլիսի 17-ին վաղ առավոտյան «Սասնա ծռեր» խմբի անդամները բեռնատար ավտոմեքենայով ջարդել էին ոստիկանական ՊՊԾ գնդի մուտքի դարպասները, ներս մտել գնդի տարածք ու գրավել այն։ Խումբը պահանջում էր Սերժ Սարգսյանի հրաժարականն ու քաղբանտարկյալների ազատ արձակումը։ 14 օր տևած պաշարումից և մարդկային մի քանի կորուստներից հետո խմբի անդամները վայր դրեցին զենքն ու հանձնվեցին իրավապահներին։ Այդ դեպքերի ժամանակ զոհվել են ոստիկանության գնդապետ Արթուր Վանոյանը, ավագ ենթասպա Գագիկ Մկրտչյանը և լեյտենանտ Յուրի Տեփանոսյանը։
Ոստիկանների սպանության համար մեղադրանք է առաջադրվել խմբի անդամներից Արմեն Բիլյանին ու Սմբատ Բարսեղյանին։
