ԵՐԵՎԱՆ, 28 օգոստոսի — Sputnik. «Վեոլիա ջուր» ընկերությունը հաղորդագրություն է տարածել, որտեղ հայտնում է Սյունիքի մարզի Գորիսի ու Սիսիանի տարածաշրջանում այսօր առավոտյան խմելու ջրի մատակարարման խափանման պատճառը։
Առավոտյան, ստանալով ջրամատակարարման խափանման վերաբերյալ ահազանգը, «Վեոլիա ջրի» տարածքային գրասենյակների աշխատակիցները, վթարի պատճառը պարզելու համար գնացել են լեռեր` նպատակ ունենալով բարձրանալ մինչև Սյունյաց լեռներում գտնվող «Մուխուրթուրյան» ջրաղբյուր: Սակայն, ինչպես նշված է հաղորդագրության մեջ, ճանապարհին՝ Սպանդարյան գյուղի մոտակայքում ջրատարի վրա նկատել են ջրի մեծ հոսք ու պարզել, որ անհայտ անձինք բացել են խողովակաշարի փականն ու ամբողջ տարածքը հեղեղել խմելու ջրի ահռելի հոսքով։
«Միանշանակ ասել, թե ինչով է պայմանավորված այդօրինակ անմարդկային արարքը, չենք կարող: Գուցե դիտավորություն էր, գուցե անզգուշություն, կամ էլ դա տեղի հովիվների արարքն էր՝ ոչխարներին լողացնելու նպատակով: Ամեն դեպքում արդյունքը մեկն էր. Գորիսի, և ոչ միայն, տասնյակ հազարավոր բնակիչներ մնացել էին անջուր ու, բնականաբար, «Վեոլիա ջրին» էին մեղադրում ստեղծված իրավիճակի համար»,- ասված է ընկերության հաղորդագրության մեջ։
Ձեռնարկված միջոցների շնորհիվ իրավիճակն արագ կարգավորվել է։
«Վեոլիա ջուրը» հիշեցնում է, որ այսօր, ժամը 11.00-ի սահմաններում կաթվածահար էր եղել Գորիս քաղաքի ջրամատակարարումը: «Մուխուրթուրյան» 500մմ տրամագծով մայրուղային խողովակաշարով ստացվող ջրաքանակը կտրուկ նվազել էր՝ վայրկյանում 240 լիտրից իջնելով մինչև 70-ի:
