ԵՐԵՎԱՆ, 6 սեպտեմբերի — Sputnik. 2008թ-ի մարտի 1-2-ի իրադարձությունների ժամանակ ոստիկանապետ Վալերի Օսիպյանը ցուցարարների մոտ տեսել է փայտեր, բայց չի տեսել զենք-զինամթերք։ Այսօր կառավարության նիստից հետո այս մասին ասաց Օսիպյանը` պատասխանելով լրագրողների հարցերին։
Օսիպյանը նշեց, որ ընդգրկված են եղել տարբեր ստորաբաժանումներ, բայց դա չի նշանակում, որ բոլորը ենթակա են պատասխանատվության կամ առհասարակ ենթակա են պատասխանատվության։
Այն հարցին, թե ցուցարարներին ցրելու ժամանակ եղե՞լ է արդյոք հրազենային զենքի օգնությամբ ցուցարարներին ցրելու փորձ, Օսիպյանը հայտարարեց, որ չի կարող դա իմանալ, քանի որ այդ ժամանակ չի զբաղեցրել համապատասխան պաշտոններ։
«Քննիչները կքննեն գործը և կհանգեն եզրակացության», — ասաց ոստիկանապետը։
Օսիպյանը հավելեց, որ ինքը, ինչպես նաև իր հարյուրավոր գործընկերներն այդ ժամանակ եղել են Երևանի կենտրոնում։
«Մարտի 1-ի դեպքերի ժամանակ ցուցարարների մոտ զենք-զինամթերք չի տեղել: Բայց փայտեր և այլն բոլորս էլ տեսել ենք: Այս հարցերն ուղղեք այն մարդկանց, ովքեր այդ օրերին վերադաս են եղել»,- ասաց Օսիպյանը` նշելով, որ մարտի 1-ի գործով ցուցմունք տալու չի հրավիրվել։
Նա բացառեց, որ այսօր Հայաստանում իրավապահ մարմինները մարդկային զոհ թույլ կտան ցույցը ցրելիս։
«Դա անթույլատրելի է։ Ես բացառում եմ, որ Հայաստանում նման բան կարող է լինել։ Միայն զինված հեղաշրջման դեպքում։ Բայց ես բացառում եմ, որ մեր քաղաքացիները կգնան դրան։ Եվ ոստիկանությունն էլ չի գնա նման բանի», — ասաց Օսիպյանը։
Նա նշեց, որ հակառակը` ոստիկանությունն ուզում է ամրապնդել կապերը հասարակության հետ և ցույց տալ, որ ոստիկանը հասարակության մասնիկն է։
Հիշեցնենք` 2008 թվականի փետրվարի 24-ին Հայաստանի ԿԸՀ-ն հայտարարել էր, որ ընտրություններում հաղթել է Սերժ Սարգսյանը։ Բողոքի ակցիայի մասնակիցները պահանջում էին վերահաշվարկել քվեները։
Մարտի 1-ի գիշերը Ազատության հրապարակում ոստիկանական ուժերը օպերատիվ-հետախուզական գործողություններ էին իրականացրել «տեղանքը ստուգելու» համար, որի արդյունքում հազարավոր ցուցարարների հեռացրել էին հրապարակից։
Մարտի 1-ի երեկոյան ԶՈՒ և ոստիկանության ստորաբաժանումները Երևանի կենտրոնական փողոցներում զենքի, պայթուցիկ սարքերի և հատուկ միջոցների օգնությամբ ցուցարարներին ցրելու համար հատուկ գործողություններ էին իրականացրել։ Արդյունքում հարյուրավոր մարդիկ վնասվածքներ էին ստացել, մահացել էին 8 քաղաքացիական անձ և 2 ոստիկան։
10 տարի չբացահայտված մնացող քրեական գործը թավշյա հեղափոխությունից հետո ՀՔԾ-ում նոր թափ է ստացել։ Հունիսի 3-ին մեղադրանք է առաջադրել ՀՀ պաշտպանության նախկին նախարար Միքայել Հարությունյանին ու նրա նկատմամբ հայտարարել հետախուզում։
