ԵՐԵՎԱՆ, 10 սեպտեմբերի — Sputnik. ՀՅԴ խմբակցության ղեկավար Արմեն Ռուստամյանը չի բացառում, որ ՀՀ պաշտպանության նախկին նախարար Միքայել Հարությունյանին քաղաքական ապաստան կտան Ռուսաստանում։
«Սա հարց է, որը կարող է շատ լուրջ հետևանքներ ունենալ այն իմաստով, որ քաղաքական ապաստան հենց այնպես չեն տալիս»,- այսօր ԱԺ-ում լրագրողների հետ զրույցում ասաց Ռուստամյանը` անդրադառնալով ՌԴ-ի կողմից 2008թ. Երևանում մարտի 1-ի դեպքերի համար մեղադրվող ՀՀ պաշտպանության նախկին նախարար Միքայել Հարությունյանի հետախուզումն իր տարածքում չեղարկելու որոշմանը։
Պատգամավորը նաև կարծում է, որ չեղարկումից հետո ռուսական կողմը կհայտարարի նաև Հարությունյանին քաղաքական ապաստան տրամադրելու մասին։
Ռուստամյանը հավելեց նաև` եթե Հարությունյանին ապաստան տրվի, կնշանակի` ռուսական կողմն անարդարացի է համարում Հարությունյանի նկատմամբ իրականացվող քննությունն ու քրեական հետապնդումը։
Հիշեցնենք, ՀՀ պաշտպանության նախկին նախարար, գեներալ-գնդապետ Միքայել Հարությունյանին մեղադրանք է առաջադրվել 2008 թվականի մարտի 1-ի իրադարձությունների օրերին սահմանադրական կարգը տապալելու համար և հեռակա կարգով դատապարտվել է կալանքի, նրա նկատմամբ միջազգային հետախուզում է հայտարարվել: Սակայն օրերս Հայաստանի ոստիկանությունը հայտարարեց, որ ռուսական կողմից գրավոր ծանուցում է ստացել նախարարի նկատմամբ հետախուզությունը դադարեցնելու մասին:
