ԵՐԵՎԱՆ, 11 սեպտեմբերի — Sputnik. Խորհրդարանն այսօր քննարկում է մեկ տարի առաջ Տաջիկստանի Հանրապետության հետ կնքված երկու երկրների կրթության որակավորումների, գիտական աստիճանների ու գիտական կոչումների փոխճանաչման մասին համաձայնագիրը վավերացնելու հարցը:
Կրթության և գիտության նախարար Արայիկ Հարությունյանը, համաձայնագիրը ներկայացնելով և պատգամավորների հարցերին պատասխանելով, անդրադարձավ նաև հայաստանյան բուհերի դիպլոմներից մի շարք երկրներում առկա դժգոհություններին:
«Ծառուկյան» խմբակցության պատգամավոր Տիգրան Ուրիխանյանը հետաքրքրվեց, թե ինչ լուծում ստացավ Իսրայելի կողմից Հայկական բժշկական համալսարանի դիպլոմները չընդունելու խնդիրը: Պարզվեց` ոչ մի: Ավելին` Իսրայելին այս հարցում նաև այլ երկրներ են ավելացել, որոնց թվում է, ըստ նախարարի, Իսրայելի հետ «քաղաքական խնդիրներ ունեցող մեկ այլ երկիր»:
«Մի շարք մասնավոր բժշկական բուհեր Հայաստանի բուհական վարկանիշի իմիջի հետ կապված խնդիրներ են ստեղծում: Ներկայում այդ ուղղությամբ աշխատանքներ տարվում են, որ այդ խնդիրները վերացվեն»,- ասաց Արայիկ Հարությունյանը, բայց և հավելեց, որ պետական բժշկական համալսարանի կրթության որակից ևս արտասահմանում գոհ չեն:
Դժգոհների թվում է նաև Իրանը: Նախարարը հայտնեց, որ Հայաստանում սովորող իրանցի ուսանողների թիվը տարեցտարի նվազում է: ՀՀ-ում ԻԻՀ դեսպանը ԿԳ նախարարին հայտնել է իրենց երկրի մտահոգությունները, մասնավորապես պոլիտեխնիկական և բժշկական համալսարանների կրթության որակի վերաբերյալ:
«Իրանի մեր գործընկերները մատնանշում են, որ մենք որակի հետ կապված ունենք խնդիրներ, և սա է իրենց մտահոգությունը: Ես պատրաստվում են առաջիկայում մեկնել իրան: Պայմանավորվածությունը նախնական կա: Պատվիրակության մեջ կլինեն այդ բուհերի ղեկավարները, որպեսզի տեղերում քննարկենք և լուծումներ գտնենք, որովհետև Իրանի կրթական շուկան մեզ համար շատ կարևոր է»,- ասաց նախարարը:
Ինչ վերաբերում է այսօր ԱԺ-ում քննարկվող Տաջիկստանի հետ կրթական ոլորտի համաձայնագրին, Հարությունյանը հայտնեց, որ Հայաստանում այսօր 6 տաջիկ ուսանող է սովորում` 3 բուհերում, իսկ Տաջիկստանում սովորող հայ ուսանողների տեղեկություններ չկան: ՀՀԿ խմբակցության պատգամավոր Միհրան Պողոսյանն այս հայտարարությանն ի պատասխան տարակուսանք հայտնեց, որ համաձայնագիրը վավերացվում է ընդամենը 6 տաջիկ ուսանողի համար:
Կրթության նախարարը հակադարձեց ՀՀԿ-ական պատգամավորին` հայտնելով, որ համաձայնագիրը 2017թ-ի հունիսին կնքել են Տաջիկստանի նախագահն ու ՀՀ նախագահը, որը նաև ՀՀԿ նախագահն էր: «Այն ժամանակ պետք է լիներ հարցադրումը` նպատակահարմար է, թե ոչ»,- ասաց նախարարը` իր կողմից ավելացնելով, որ ինքն անձամբ կողմ է նման բոլոր համաձայնագրերին, քանի որ դրանք բարձրացնում են Հայաստանի կրթության ոլորտի միջազգային վարկանիշը:
