ԵՐԵՎԱՆ, 21 սեպտեմբերի — Sputnik. ՀՀԿ փոխնախագահ, ԱԺ պատգամավոր Արմեն Աշոտյանը Facebook սոցիալական ցանցում հրապարակել է ՀՀ վարչապետի աշխատակազմից ԱԺ ուղարկված հրավիրատոմսը, որով ՀՀԿ խմբակցությունն այսօր 17։00-ին հրավիրվում է ՀՀ վարչապետի նստավայր` անկախության 27-ամյակին նվիրված տոնական ընդունելությանը մասնակցելու։
«Այսօր, Հայաստանի ամենակարևոր պետական տոնին, իշխանության ղեկին հայտնված մարդիկ կրկին ցույց են տալիս, որ չունեն պետականության ընկալում, չունեն դաստիարակության և բարեկրթության պատշաճ մակարդակ։ Ազգային ժողովի պատգամավորներին այս կերպ հրավիրելով պետական տոնին՝ ապացուցում եք, որ շարունակում եք դասեր չքաղել սեփական սխալներից, դրսևորում եք պետական մտածելակերպի իսպառ բացակայություն»,- գրել է Աշոտյանը։
Վարչապետի աշխատակազմի ղեկավար Էդուարդ Աղաջանյանը Facebook-ի իր էջում արձագանքել է Աշոտյանի դիտարկմանը։
«Պաշտոնապես հայտարարում եմ, որ բոլոր պատգամավորներին այսօր առավոտյան ուղարկվել են նաև անհատական հրավերներ, այդ թվում` նաև պարոն Աշոտյանին: Վերջինիս օգնականի և իր հետ անձամբ հնարավոր չի եղել կապ հաստատել ամբողջ օրը: Վերջապես կապնվել է իմ օգնականը, ում ի պատասխան հարգարժան պատգամավորը հայտնել է, որ չի ընդունում հրավերը` հաշվի առնելով, որ «այն ուշացած է»»,- գրել է Աղաջանյանը` հույս հայտնելով, որ Աշոտյանը, այնուամենայնիվ, կմտափոխվի ու կընդունի հրավերը։
Ի դեպ, ավելի ուշ Աշոտյանի գրառման տակ հրապարակվել է նաև այդ` անհատական հրավիրատոմսի լուսանկարը, որի տակ Արմեն Աշոտյանը գրել է. «Շնորհակալություն։ Լավ է ուշ, քան երբեք։ Գուցե վա՞ղը տպեին»։
Հիշեցնենք` մայիսի 28-ին ԱԺ ղեկավարությունը չէր ընդունել նաև Սարդարապատում կազմակերպված Առաջին Հանրապետության 100-ամյակին նվիրված տոնական միջոցառումներին մասնակցելու հրավերը։
Այդ ժամանակ կառավարությունից ԱԺ-ն ստացել էր 13 հրավիրատոմս, որից 4-ը` «Ելք» խմբակցությունը, 3-ական` «Ծառուկյան», ՀՀԿ և ՀՅԴ խմբակցությունները։
Ընդ որում, Արա Բաբլոյանը հրավիրվել էր ոչ թե որպես ԱԺ նախագահ, այլ որպես ՀՀԿ խմբակցության ներկայացուցիչ, այդ պատճառով էլ որոշել էր չգնալ միջոցառմանը։
