ԵՐԵՎԱՆ, 6 հոկտեմբերի — Sputnik. Արամ Վարդանյանը, որը հանրությանն առավել հայտնի է «Վստրեչի ապեր» մականվամբ, ազատ է արձակվել 50 միլիոն գրավի դիմաց։ Այս մասին Sputnik Արմենիային հայտնեց նրա փաստաբան Լուսինե Սահակյանը։
Արամ Վարդանյանը Արաբական Միացյալ Էմիրություններից Հայաստան էր արտահանձնվել հոկտեմբերի 4-ին, քանի որ հետախուզվում էր մի խումբ անձինք, նախնական համաձայնությամբ, բռնություն գործադրելով մարդուն առևանգելու համար:
Հիշեցնենք` ՀՀ-ում մայիսին տեղի ունեցած թավշյա հեղափոխությունից հետո մի քաղաքացի դիմել էր ոստիկանություն ու հայտնել, որ մեկ տարի առաջ՝ 2017 թվականի հուլիսի 17-ին, Նորագավիթ թաղամասում գտնվող սուպերմարկետի մոտից Վստրեչի ապերն ու մի խումբ անձինք, բռնություն գործադրելով առևանգել են իրեն, տեղափոխել Արցախի փողոցում գտնվող, Վարդանյանին պատկանող մի շինություն ու տևական ժամանակ պահել այնտեղ՝ ծեծի ենթարկելով ու մարմնական վնասվածքներ պատճառելով:
ԱՄԷ-ից Հայաստան վերադարձվելուց հետո Արամ Վարդանյանը ձերբակալվել էր: 2 օր անց նրա նկատմամբ որպես խափանման միջոց է կիրառվել գրավը:
Գործի նախաքննությունը շարունակվում է:
