ԵՐԵՎԱՆ, 8 հոկտեմբերի — Sputnik. Դատական տեղեկատվական համակարգում հրապարակված տեղեկատվության համաձայն` Երևան քաղաքի ընդհանուր իրավասության դատարանը վարույթ է ընդունել ՀՀ երկրորդ նախագահ Ռոբերտ Քոչարյանի որդու` Սեդրակ Քոչարյանի հայցն ընդդեմ քաղաքագետ Արա Պապյանի։
Հայցը վարույթ ընդունելու մասին դատարանի որոշումից պարզ է դառնում, որ Քոչարյանի որդին զրպարտության դիմաց փոխհատուցում ստանալու և հրապարակայնորեն հերքելու պահանջ է ներկայացրել` միաժամանակ պատասխանող կողմից 2 մլն դրամ փոխհատուցում պահանջելով։
Հիշեցնենք` ըստ մամուլում առկա տեղեկությունների` Սեդրակ Քոչարյանի դատարան հայցը վերաբերում է լրատվամիջոցներում Պապյանի հնչեցրած այն տեսակետին, թե Քոչարյանի ժամանակ Հայաստանի տնտեսությունը զարգացել է 8 անգամ, մինչդեռ կարող էր 18-20 անգամ զարգանալ, եթե գործարարների նկատմամբ ճնշումներ չլինեին:
Պապյանը նաև հայտարարել էր, թե անձամբ դեպքեր գիտի, որ մարդկանց ճնշել են, ծեծել, թույլ չեն տվել բջջային հեռախոսների ներկրման ու վաճառքի ոլորտում բիզնեսով զբաղվել, որովհետև դա եղել է Սեդրակ Քոչարյանի ոլորտը։
