ԵՐԵՎԱՆ, 9 հոկտեմբերի – Sputnik. Երևանի Ավագանու «Բարգավաճ Հայաստան» խմբակցության անդամները հրաժարվելու են ծառայողական մեքենաներից։ Այս մասին ասաց խմբակցության ղեկավար Արման Աբովյանը։
«Երևանի բյուջեն 80 միլիարդ դրամ է, օբյեկտիվ և սուբյեկտիվ պատճառներով այն չի համապատասխանում մայրաքաղաքի ծավալներին։ Լուրջ հարց է դրվել` ինչպես մեծացնել բյուջեն` միաժամանակ կրճատելով անհասկանալի ծախսերը», – ասաց Աբովյանը։
Նրա խոսքով` ծախսվող գումարների արդյունավետության բարձրացման հարցը շատ սուր է դրված։ Ավագանու ԲՀԿ անդամները պատրաստ են օգնել բյուջեի բեռնվածությունը թեթևացնելու հարցում։
Արման Աբովյանը հայտարարեց, որ իրենք հրաժարվում են ծառայողական մեքենայից:
«Սրանով ցույց ենք տալիս մեր աշխատանքի հիմնական ուղղությունները։ Կոչ եմ անում մեր գործընկերներին նույն քաղաքականությունը որդեգրել, մեր ապագա քաղաքապետին, թաղապետներին՝ հրաժարվել ծառայողական մեքենաներից», — ասաց Արման Աբովյանը։
Նրա խոսքով` ավելի ճիշտ կլիներ, որ քաղաքապետարանում հասարակական տրանսպորտով զբաղվող մարդիկ իրենք օգտվեն դրանից։ Դա թույլ կտա նրանց ավելի լավ ծանոթանալ ոլորտի խնդիրներին։
Նա նշեց, որ կարելի է տեղաշարժվել նաև հեծանիվներով, հատկապես, որ այդպիսի նախադեպ արդեն կա։
«Դա կատակ չէ, դա ճիշտ և հաճելի միտում է», – ասաց Աբովյանը։
Նա ընդգծեց, որ ԲՀԿ–ն չի պատրաստվում խիստ ընդդիմություն լինել, բայց հետևելու է քաղաքապետարանի աշխատանքին։
Հիշեցնենք` Երևանի Ավագանու ընտրություններից հետո «Բարգավաճ Հայաստանը» 65–ից 5 մանդատ է ստացել։
Հիշեցնենք նաև, որ սեպտեմբերի 23-ին կայացած ավագանու ընտրություններում, ԿԸՀ տվյալներով, «Իմ քայլը» դաշինքը ստացել էր 81,06, «Բարգավաճ Հայաստանը»` 6,95, «Լույս» դաշինքը՝ 4,99 տոկոս ձայն։
Ավագանու առաջին նիստը նախանշված է հոկտեմբերի 10-ին, Հայկ Մարությանի երդման արարողությունը` հոկտեմբերի 13-ին։