ԵՐԵՎԱՆ, 15 հոկտեմբերի — Sputnik. Հայաստանում տեղի ունեցած «թավշյա հեղափոխությունը» գրեթե չի անդրադարձել հայ և ռուս գործարարների տնտեսական համագործակցության վրա։ Այս մասին Երևանում կայացած ասուլիսում ասաց Հայաստանում ՌԴ առևտրային ներկայացուցիչ Անդրեյ Բաբկոն։
Նա կարծում է, որ քաղաքական իրադարձությունները չպետք է ստվեր գցեն տնտեսական համագործակցության զարգացման և ներդրումային միջավայրի ձևավորման վրա։ Բաբկոն նաև համոզված է, որ քաղաքական ասպարեզում նույնպես համագործակցությունը ամրապնդվում է` նշելով վարչապետ Նիկոլ Փաշինյանի և ՌԴ նախագահ Վլադիմիր Պուտինի միջև կապերը։
Սակայն որոշ իրադարձություններ, մասնավորապես, «դիմակազերծումները», ըստ նրա, այդքան էլ լավ չեն անդրադառնում ներդրումային միջավայրի ձևավորման վրա։
Ավելի վաղ խուզարկություններ են անցկացվել Հայաստանում գործող որոշ ձեռնարկություններում, այդ թվում` «Հարավկովկասյան երկաթուղի» ընկերությունում (Ռուսական երկաթուղիների դուստրը)։
«Չենք թաքցնի, որ Հայաստանում ձեռնարկությունների 3/4-ը ռուսական կապիտալով ընկերություններ են կամ ռուսական առաջատար ընկերությունների ներկայացուցչություններ։ Քաղաքականությունը պետք է զգույշ լինի», — նշեց նա։
Միայն ընթացիկ տարվա հունվար-հունիսին երկրների միջև ապրանքաշրջանառությունը մոտ 25 տոկոսով գերազանցել է անցած տարվա ցուցանիշը։ «Դա հույս է ներշնչում, որ այս տարվա արդյունքները բավական հաջող կլինեն»,- հավելեց Բաբկոն։ Նրա կարծիքով` դրական փոփոխությունները կապված են Եվրասիական միությանը Հայաստանի անդամակցության հետ։
Ավելացել են նաև Ռուսաստան արտահանվող հայկական արտադրանքի ծավալները և տեսականին։ Ավանդաբար արտահանվող գինուց, կոնյակից և գյուղատնտեսական արտադրանքից բացի, ակտիվացել է նաև ձկան, տեքստիլի և կոշկի արտադրությունը։ Նրա խոսքով` աճը կարող է կապված լինել համատեղ արտադրություն սկսելու և արտադրանքի որակը բարելավելու հետ։
«Հայ-ռուսական հարաբերությունները զարգանում են` չնայած արտաքին սպառնալիքներին և խոչընդոտներին», — նշեց նա։
Նշենք, որ Ռուսաստանի և Հայաստանի միջև ապրանքաշրջանառությունն անցած տարվա ընթացքում աճել է 30 տոկոսով։ Ռուսաստանից Հայաստան արտահանումն ավելացել է 28 տոկոսով և հասել մեկ միլիարդ դոլարի, ներկրումն աճել է 26 տոկոսով և հասել 0,5 միլիարդ դոլարի։
