ԵՐԵՎԱՆ, 17 հոկտեմբերի — Sputnik. Սերժ Սարգսյանը հարգանքով է ընդունել Գևորգ Կոստանյանի` Նիկոլ Փաշինյանի կողքին լինելու որոշումը։ Այսօր լրագրողների հետ զրույցում այս մասին ասել է ԱԺ ՀՀԿ խմբակցության պատգամավոր, Պետաիրավական և մարդու իրավունքների մշտական հանձնաժողովի նախագահ Գևորգ Կոստանյանը։
«Ես երբևէ և որևէ առումով իմ սկզբունքներից չեմ շեղվել և չեմ շեղվելու: Եթե որևէ մեկը դա կարող է դիտարկել շեղում, ես մեծ հաճույքով կլսեմ բոլոր հիմնավորումները»,-հայտարարեց Կոստանյանը:
Իր այս որոշումը, Կոստանյանի համոզմամբ, ոչ միայն շեղում չէ իր սկզբունքներից, այլև չի հակասում ՀՀԿ խմբակցության դիրքորոշմանը, քանի որ խմբակցությունն էլ հայտարարություն է տարածել այն մասին, որ չի խոչընդոտելու արտահերթ խորհրդարանական ընտրությունները։
«Ես կուսակցական չեմ, չեմ եղել և չեմ լինելու երբեք, որովհետև կուսակցական լինելու պարագայում դու կաշկանդված ես կուսակցական շահերով, կանոններով և կարգապահությամբ: Ես կուսակցական չեմ եղել հենց այն նկատառումից ելնելով, որ երբևէ քաղաքական կաշկանդվածություն չունենամ իմ դիրքորոշումը արտահայտելու տեսակետից»,- ասաց Կոստանյանը:
Լրագրողների դիտարկմանը, թե մայիսի 8-ին իր ելույթում Կոստանյանը խիստ քննադատում էր Նիկոլ Փաշինյանին` ասելով, որ նրան չի կարելի վստահել պետության ղեկը, իսկ հիմա հակառակն է պնդում, պատգամավորը պատասխանեց. «Այս ամիսների ընթացքում ես տեսա և համոզվեցի, որ Նիկոլ Փաշինյանի նպատակները և ցանկությունները ազնիվ են և ուղղված են պետության բարօրությանը: Ցանկացած մարդ, որ երկրի բարօրության հարցում նախանձախնդիր է, պետք է օգնի, որ այդ նպատակներն իրագործվեն: Այստեղ հակասություն չկա»:
Իսկ իր ապագա անելիքների մասին Գևորգ Կոստանյանը հայտնեց, որ աշխատանքի առաջարկ է ստացել ԵՄ դատախազությունից և դեկտեմբերի 15-20-ը պետք է պատասխանի դրան։
ԵՄ դատախազությունը սկսելու է գործել 2020 թվականի հունվարից, բայց 2019-ից, Կոստանյանի խոսքով, կսկսվի կազմավորման գործընթացը։
