ԵՐԵՎԱՆ, 17 հոկտեմբերի — Sputnik. Եթե գործող Ազգային ժողովը չհասցնի ընդունել 2019 թվականի պետական բյուջեն, ոչ մի պրոբլեմ չի լինի։ Այսօր լրագրողների հետ զրույցում ասաց ՀՀ վարչապետի պաշտոնակատար Նիկոլ Փաշինյանը` հիշեցնելով, որ Սահմանադրությունը նախատեսում է նման ընթացակարգ։
Դրա համաձայն` եթե հաջորդ տարվա բյուջեն ինչ-ինչ պատճառներով չի հաստատվում, հունվարի 1-ից պետական ֆինանսավորումը շարունակվում է նախորդ տարվա բյուջեի համամասնություններով։
Բայց եթե կառավարության ու գործադիրի ղեկավարի համար բյուջեի չընդունվելը խնդիր չէ, ապա Հայաստանի ամենաանապահով խավերի համար սա կարող է բավական լուրջ խնդիր դառնալ։ Բանն այն է, որ այս խավը, որի չնչին եկամուտներն 2013թ-ից ի վեր չեն ավելացել, 2019թ-ից հետո մի փոքր ավելի լավ ապրելու հույս էր ստացել ։
Ինովացիոն և ինստիտուցիոնալ հետազոտությունների կենտրոնի ղեկավար, տնտեսագետ Ատոմ Մարգարյանը Sputnik Արմենիայի հետ զրույցում նշեց, որ բյուջեի նախագծի չընդունման դեպքում թոշակների ու նպաստների բարձրացում, փաստորեն, հունվարի 1-ից չի լինի։
«Խնդիրը վերաբերում է կենսաթոշակներին ու անապահովության նպաստներին հավելումներին, որոնցով դրանք պետք է բարձրացվեին մինչև պարենային նվազագույն զամբյուղի մակարդակը` 16 000-ից հասցվելով մինչև 25 500 դրամ»,- ասաց Մարգարյանը։
Միաժամանակ, սակայն, տնտեսագետը հիշեցրեց, որ Բյուջետային համակարգի մասին օրենքի համաձայն` գործող ԱԺ-ն նույնիսկ արձակվելուց հետո պետք է շարունակի ֆինանսական հիմնական փաստաթղթի քննարկումը մինչև նոր խորհրդարանի ձևավորումը։ Բայցևայնպես, տնտեսագետը չբացառեց, որ քաղաքական ստեղծված իրավիճակում նիստերը չեն կայանա և բյուջեի նախագիծն էլ չի հաստատվի։
Այս պարագայում բյուջեի նախագծի քննարկումը կհետաձգվի առնվազն մինչև դեկտեմբերի 20-ը, քանի որ որպես արտահերթ ընտրությունների անցկացման ժամկետ Նիկոլ Փաշինյանը հայտարարել էր դեկտեմբերի 9-10-ը։ Մինչև ընտրությունների արդյունքները վերջնականապես կհաստատվեն ու նորընտիր ԱԺ-ն կստանձնի իր լիազորությունները, կանցնի ևս նվազագույնը 10 օր։
Ասել է թե Հայաստանի ամենաանապահով խավերը դեռ ստիպված կլինեն սպասել, որ քաղաքական գործընթացներն ավարտվեն ու քաղաքական ուժերը հասնեն տնտեսական հարցերի քննարկմանը։
Ի դեպ, նշենք, որ 2019-ի բյուջեի նախագծի քննարկումներն ԱԺ-ի հանձնաժողովներում նախանշված են հոկտեմբերի 29-ից և, ըստ հաստատված ժամանակացույցի, կտևեն շուրջ 2 շաբաթ։ Եվս 1 շաբաթ էլ հատկացված է պատգամավորների առաջարկների ու լրացումների համար։ Այս հաշվարկով բյուջեի նախագիծը խորհրդարանի նիստի օրակարգ պետք է հասներ նոյեմբերի վերջին տասնօրյակում։ Բայց այդ ժամանակ քաղաքական ուժերն արդեն զբաղված կլինեն իրենց քարոզարշավներով ու հազիվ թե բյուջեի նախագծի մասին հիշելու ժամանակ ունենան։
