ԵՐԵՎԱՆ, 19 հոկտեմբերի — Sputnik. ԱԺ պետաիրավական հարցերի մշտական հանձնաժողովի նիստում այսօր հանձնաժողովի նախագահ Գևորգ Կոստանյանն արդարադատության նախարարի պաշտոնակատար Արտակ Զեյնալյանին առաջարկեց գրազ գալ։
Դա տեղի ունեցավ այն ժամանակ, երբ Զեյնալյանը ներկայացնում էր Ընտրական օրենսգրքում կառավարության առաջարկած փոփոխությունների նախագիծը։ Զեյնալյանի ելույթի ընթացքում Կոստանյանը ռեպլիկներով մի քանի անգամ ընդմիջեց Զեյնալյանին։ Վերջինի դիտարկմանը, թե հանձնաժողովի նախագահը որևէ մեկին թույլ չի տալիս խոսել իր ելույթի ժամանակ, բայց ինքը պարբերաբար ընդմիջում է մյուսներին, Կոստանյանն ասաց, որ ինքը դրա իրավունքն ունի ԱԺ կանոնակարգ օրենքով։ Զեյնալյանի դիտարկմանը, թե` նման բան չկա, Կոստանյանն առաջարկեց` եկեք գրազ գանք։
Գրազի առաջարկը մնաց օդում առկախված, իսկ Զեյնալյանը շարունակեց ներկայացնել նախագիծը։ Նա նշեց, որ նոր օրենսգրքով ամբողջովին վերացվում են թեկնածուների տարածքային, այսպես կոչված` ռեյտինգային ցուցակները։ Ընտրությունները կազմակերպվելու են առանց գրիչների, ընտրողներն ընտրելու են քաղաքական ուժերից մեկի ընտրաթերթիկը, այն դնելու են ծրարի մեջ և կնքելուց հետո, գցելու են քվեատուփի մեջ։
Հանձնաժողովում լայն քննարկման արժանացան նաև խորհրդարանում ներկայացված ուժերի պարտադիր քանակի մասին դրույթները։ Զեյնալյանը պարզաբանեց, որ պարտադիր է համարվում առնվազն 3 քաղաքական ուժերի ներկայությունը։ Բայց կարող է նաև լինել 4-րդը, եթե նրան հաջողվի հաղթահարել 2 տոկոսի արգելքը։ Իսկ դաշինքների դեպքում նվազագույնը 6 տոկոսի շեմն է։
Գևորգ Կոստանյանին հետաքրքրեց նաև տեղամասերում տեսախցիկների առկայության հարցը, որը նրա խոսքով «ուներ լուրջ ապացուցողական նշանակություն»։ Նոր օրենքով այս դրույթը որոշակի փոփոխություն է կրել։ Անշարժ տեսախցիկների փոխարեն նոր օրենքի նախագծում ամրագրվել է, թե տեղամասերում տեղադրված տեսախցիկների տեսադաշտում պետք է լինեն մուտքն ու քվեատուփը։ «Գործող օրենքով նախատեսվում է նաև տեղամասի տարածքում 50մ շառավղող մշտադիտարկում իրականացնել»,– հիշեցրեց Կոստանյանը` հարց ուղղելով, թե ինչու է այս դրույքը հանվել օրենքից։
«Նախորդ ընտրությունները կազմակերպողները չեն կարողացել ապահովել 50 մ շառավղով նկարահանումը։ 2018թ.–ի դեկտեմբերին ևս հնարավոր չի լինի։ Գուցե հետագայում դրոններով հնարավոր լինի ապահովել, բայց այս պահին դրա հնարավորությունը մենք չունենք»,– ասաց Զեյնալյանը։
Ինչ վերաբերում է տեղամասի ներսում ֆիքսված տեսախցիկներով անընդհատ նկարահանումներ կատարելուն, Զեյնալյանը նշեց, որ այս առաջարկն իրենց համար ընդունելի է և կարող է ամրագրվել։
