ԵՐԵՎԱՆ, 20 հոկտեմբերի — Sputnik. Երևան-Սևան ճանապարհը փակած ոստիկանների հարազատների ու քաղաքացիների միջև քաշքշուկ սկսվեց։ Այս մասին հայտնում է Sputnik Արմենինայի թղթակիցը դեպքի վայրից։
Երևան-Սևան ճանապարհին իրավիճակը շարունակում է լարված մնալ։ Դեպքի վայրում է նաև փոխվարչապետ Տիգրան Ավինյանը, բայց քաղաքացիների հետ բանակցություններն առայժմ արդյունքի չեն հանգեցրել։
Ավինյանը կոչ արեց ոստիկանների ծնողներին լավ փաստաբաններ վարձել և հարցը լուծել նրանց օգնությամբ։ Նրա խոսքով՝ պետք է քննություն լինի, որը կապացուցի ոստիկանների մեղքը կամ կարդարացնի նրանց։ Տվյալ փուլում ո՛չ ոստիկանները, ո՛չ նա չեն կարող ազատ արձակել նրանց։ Նման որոշում պետք է կայացնեն քննչական մարմինները։
Քաղաքացիների մյուս խումբը պահանջում է հարազատներից բացել ճանապարհը։ Նրանց և ոստիկանների կողմնակիցների միջև քաշքշուկ է սկսվել։ Նրանց փորձում են հանգստացնել իրավապահ մարմինները։
Նշենք, որ խցանման մեջ նաև չինացի զբոսաշրջիկներին տեղափոխող ավտոբուս կա։ Նրանք պետք է մեկնեին Թբիլիսիից, բայց արդեն ուշացել են թռիչքից։
Հիշեցնենք, որ խոշտանգման կասկածանքով ձերբակալված Թաթուլ Գևորգյանի, Վահագն Միքայելյանի և Սահակ Դավթյանի հարազատներն այսօր առավոտյան փակել են Երևան-Սևան մայրուղին և պահանջում են ազատ արձակել ոստիկաններին` պնդելով, որ նրանք մեղավոր չեն։
Հատուկ քննչական ծառայությունը երեկ տեղեկություն էր տարածել, ըստ որի` ձերբակալվել են Ոստիկանության Գեղարքունիքի մարզային վարչության Սևանի բաժնի քրեական հետախուզության բաժանմունքի պետն ու նույն բաժանմունքի երկու օպերլիազորները։
Նրանց կասկածում են ՀՀ ոստիկանության Սևանի բաժնում խմբի կազմում Ա. Մ.-ին խոշտանգելու մեջ: Ա. Մ.-ն ՀՀ հատուկ քննչական ծառայություն դիմում էր ներկայացրել այն մասին, որ 2018 թվականի հոկտեմբերի 7-ին ոստիկանության Սևանի բաժնի երեք աշխատակիցներ Սևան քաղաքում գործող բուքմեյքերական ընկերության գրասենյակի մոտից իրեն տեղափոխել են ոստիկանության Սևանի բաժին և ծեծի ենթարկել: Նախաքննությունը շարունակվում է: