ԵՐԵՎԱՆ, 23 հոկտեմբերի — Sputnik. «Թավշյա հեղափոխությունից» հետո հայկական որոշ ԶԼՄ-ներ, հրապարակախոսներ և քաղաքական գործիչներ դադարել են քննադատել իշխանություններին Ռուսաստանի հետ չափազանց սերտ կապերի համար։ Այս մասին Sputnik Արմենիային ասաց քաղտեխնոլոգ Արմեն Բադալյանը։
Հետազոտության համաձայն, որն իրականացվել է Sputnik տեղեկատվական գործակալության և ռադիոյի պատվերով, ֆրանսիացիների 53 տոկոսը, գերմանացիների 50 տոկոսը, բրիտանացիների 47 տոկոսը և ամերիկացիների 43 տոկոսը կարծում են, որ իրենց երկրների ԶԼՄ-ները ստեղծում են Ռուսաստանի ոչ օբյեկտիվ պատկերը։
Խոսելով Հայաստանում տիրող իրավիճակի մասին` Բադալյանը նշեց, որ հայկական ԶԼՄ-ների դիրքորոշումը մեծ մասամբ շատ չի փոխվել «թավշյա հեղափոխությունից» հետո։
Այն ԶԼՄ-ները, որոնք քննադատել են Ռուսաստանին և նրա վարած քաղաքականությունը, շարունակում են նույնն անել։ Իսկ ԶԼՄ-ների մի մասն ընդհանրապես չի շոշափում այդ թեման։
Միաժամանակ Հայաստանի արտաքին քաղաքականությունը չի փոխվել։ Ավելին, նոր իշխանություններն ավելի սերտ են համագործակցում Մոսկվայի հետ, քան նախկինները։
Մյուս կողմից` որոշ ԶԼՄ-ներ, իսկ ավելի հաճախ հասարակական գործիչներ և հրապարակախոսներ, որ հեղափոխությունից առաջ քննադատում էին Հայաստանի նախկին իշխանություններին Ռուսաստանի նկատմամբ ունեցած դիրքորոշման համար, հիմա դրական երանգներ են տեսնում հայ-ռուսական սերտ հարաբերություններում։
«Նախկինում «արևմտամետները», լինեն նրանք լրագրողներ, թե քաղաքական գործիչներ, ակտիվորեն քննադատում էին նախկին նախագահին Ռուսաստանի հետ սերտ կապերի համար։ Հիմա նրանց մի մասն ընդհանրապես չի քննադատում ներկա իշխանություններին Ռուսաստանի հետ ավելի սերտ հարաբերությունների համար, իսկ մյուս մասը սկսել է միայն դրականը տեսնել», — ասաց Բադալյանը։
Քաղտեխնոլոգը կարծում է, որ դա կապված է հենց իշխանությունների հանդեպ ունեցած վերաբերմունքի հետ. այն ամենը, ինչ արել է ՀՀԿ-ն, վատ էր, իսկ ինչ անում են նոր իշխանությունները` լավ։ Բադալյանի կարծիքով` դա ավելի շատ նման է քարոզչության, քան ինչ-որ վերլուծության։
Նրա խոսքով` բացառված չէ, որ կան նաև այլ պատճառներ։
