ԵՐԵՎԱՆ, 27 հոկտեմբերի — Sputnik. Հոկտեմբերի 26-ին Նուբարաշեն քրեակատարողական հիմնարկում պատիժը կրող ցմահ դատապարտյալներից 11-ն անժամկետ հացադուլ են հայտարարել։ Այս մասին հայտնում է forrights.am-ը` նշելով, որ նրանք խնդրագրով դիմում են ՀՀ վարչապետի պաշտոնակատար Նիկոլ Փաշինյանին։
«Հարգելի պարոն Փաշինյան, ստիպված հայտարարելով անժամկետ հացադուլ` դիմում ենք Ձեզ ցմահ դատապարտված կալանավորներս։ Շատ տարիներ մենք հույսներս չէինք կորցնում, որ իշխանության կգա մի այնպիսի մարդ, ով կունենա սիրտ, հոգի և խիղճ։ Հարգելի պարոն Փաշինյան Ձեզ դիմում ենք մեկ անձի սպանության մեղադրանքով դատապարտվածներս, ինչի համար ամեն օր ներում ենք խնդրում Աստծուց։
Խնդրում ենք նաև Ձեզ, մեր ցմահի վճիռները ներում շնորհելով փոխարինել տարիների՝ ինչքան որ նախատեսում է սպանության հոդվածը»,- գրված է նամակում։
Նրանք նշել են, որ միանգամից ազատություն չեն պահանջում, այլ խնդրում են ներել և ցմահի ստատուսը հանել իրենց վրայից։
«Արդյո՞ք մեկ անձի սպանության համար դատապարտված մարդուն հնարավոր չէ տեղավորել 20 տարի պատժաչափի մեջ։ Եթե այն ժամանակ, երբ մենք դատապարտվում էինք, գործեր 20 տարի պատժաչափի օրենքը, մենք ցմահ չէինք դատապարտվի»,- գրել են ցմահ դատապարտվածները` նշելով, որ իրենցից շատերն ամուսնացել են կալանքի ժամանակ և ունեն փոքր երեխաներ, շատերն էլ ցանկանում են ընտանիք կազմել, բայց ազատության մեջ։
«Հարգելի պարոն Փաշինյան մեր դիմացկունությունը սպառվել է անարդար վիճակից։ Թեկուզ ուշացումով՝ մենք սկսեցինք մեր բողոք-խնդրանքի ձայնը բարձրացնել, և պատրաստ ենք գնալ մինչև վերջ հանուն մեր երեխաների և հարազատների»,- գրել են Նուբարաշեն ՔԿՀ-ի ցմահ դատապարտյալները:
Նշենք, որ օրեր առաջ Ազգային ժողովի պաշտոնական կայքում հրապարակվել է քրեական գործերով համաներում հայտարարելու մասին օրենքի նախագիծը: Համաներումը հայտարարվելու է Էրեբունի-Երևանի հիմնադրման 2800-ամյակի և Հայաստանի առաջին Հանրապետության անկախության հռչակման 100-ամյակի կապակցությամբ: Նախագծում նշված է, որ համաներումը չի կիրառվի ցմահ ազատազրկման դատապարտված անձանց նկատմամբ։
