ԵՐԵՎԱՆ, 16 նոյեմբերի — Sputnik. Կենտրոնական ընտրական հանձնաժողովը հրապարակել է դեկտեմբերի 9-ին կայանալիք ԱԺ արտահերթ ընտրությունների նախընտրական քարոզչության համար տրամադրվող վճարովի եթերաժամի սակագները:
Ժամը 18:00-20:00-ն ընկած ժամանակահատվածի համար «Արմենիա» ՀԸ–ն 1 րոպե եթերաժամի համար սահմանել է 100 հազար դրամ (ներառյալ՝ ԱԱՀ-ն) սակագին, «Շանթը» ևս 1 րոպեի համար 100 հազար դրամ է սահմանել:
Այս երկու հեռուստաընկերություններից հետո մյուսների համեմատ բարձր սակագին է սահմանել «Հ2»-ը: Հայկական երկրորդ հեռուստաալիքը շաբաթվա առաջին վեց օրերին, ժամը 18:00-24:00-ը և կիրակի օրերին ժամը 10:00-24:00-ն ընկած ժամանակահատվածում յուրաքանչյուր 1 րոպեի համար սահմանել է 60 հազար (ներառյալ՝ ԱԱՀ-ն), իսկ հեռուստաընկերության եթերաժամային մյուս գոտում ցանկացած 1 րոպեի համար` 30 հազ. դրամ սակագին (ներառյալ՝ ԱԱՀ-ն):
«Առաջին ալիք» հեռուստածրագիրը (Հայաստանի հանրային հեռուստաընկերություն) այս ցուցակում չորրորդն է` նախընտրական քարոզչության համար տրամադրվող յուրաքանչյուր 1 րոպե եթերաժամանակի համար սահմանված 48 հազար դրամով (ներառյալ՝ ԱԱՀ-ն): Մի փոքր տարբերությամբ հաջորդում է «Ա -Թիվի» առավոտյան հեռուստածրագիրը` 40 հազար դրամով (ներառյալ՝ ԱԱՀ-ն):
«Կենտրոն» ու «Երկիր Մեդիա» հեռուստաընկերությունները ժամը 18:00-24:00-ն ժամանակահատվածում յուրաքանչյուր 1 րոպեի համար սահմանել են համապատասխանաբար 24 հազար դրամ (ներառյալ՝ ԱԱՀ-ն) և 25 հազար դրամ (ներառյալ՝ ԱԱՀ-ն) սակագները:
Հայաստանում արտահերթ խորհրդարանական ընտրությունները կայանալու են 2018 թվականի դեկտեմբերի 9-ին: Քարոզչության համար նախատեսված ժամանակահատվածը նոյեմբերի 26-ից դեկտեմբերի 7-ն է։ Ընտրական օրենսգրքով սահմանվել է 12-օրյա ժամկետ:
