ԵՐԵՎԱՆ, 11 դեկտեմբերի — Sputnik. ՀՀ ԱԺ նախագահ Արա Բաբլոյանը շնորհավորել է նոր խորհրդարան ձևավորելու կապակցությամբ։
Այս մասին տեղեկացնում են ՀՀ ԱԺ մամուլի ծառայությունից։
«Անկախ քաղաքական ուժերի միջև եղած տարաձայնությունների, նրանց մրցավազքից ու անզիջում պայքարից, այդ ընթացքում ձևավորվեց այնպիսի մթնոլորտ, որը Հայաստանի Հանրապետության քաղաքացուն հնարավորություն տվեց ընդունելու որոշում և դրանով ուրվագծելու իր ապագա սպասումներն ու իղձերը: Ընտրությունների արդյունքները որքան ուրախալի են խորհրդարան անցած քաղաքական ուժերի համար, կրկնակի պարտավորեցնող են, քանի որ ստանալով ընտրողների վստահությունը` քաղաքական ուժերը պետք է մշտապես հիշեն, որ ստանձնել են նույն ընտրողների սպասումների և իղձերի իրականացման հանձնառությունը, որը պետք է իրագործեն մեծ պատասխանատվությամբ: Հույս ունեմ, որ հաջողության եք հասնելու»,–գրել է Բաբլոյանը:
ՀՀ ԱԺ նախագահը շնորհավորել է նոր խորհրդարանի ձևավորման առթիվ և հետագա օրինաստեղծ աշխատանքում մաղթել նոր ձեռքբերումներ ու նվաճումներ հանուն Հայաստանի Հանրապետության հզորացման, Արցախի անվտանգության և մեր ժողովրդի բարօրության:
