ԵՐԵՎԱՆ, 13 դեկտեմբերի – Sputnik. Ռուսաստանի հետ գազի սակագնի շուրջ բանակցությունները դեռևս շարունակվում են, մինչ դրանց ավարտը Ռուսաստանը Հայաստանի համար չի փոխի գազի գինը։ Հայաստանի Հանրապետության էներգետիկ ենթակառուցվածքների և բնական պաշարների նախարարի պաշտոնակատար Գարեգին Բաղրամյանն այս մասին ասաց լրագրողներին։
Մինչ բանակցությունների ավարտը (երբ էլ դրանք ավարտվեն) ուժի մեջ են մնալու գործող պայմանավորվածությունները։
Նախարարի պաշտոնակատարի խոսքով՝ գազի վերջնական գինը պարզ կլինի, երբ բանակցություններն ավարտվեն: «Հունվարի մեկից գազի գինը կպահպանվի։ Կրկնում եմ՝ եթե բանակցություններն ավարտված չլինեն, պահպանվելու է այն, ինչ այսօր ունենք», - ասաց նախարարի պաշտոնակատարը։
«Բանակցությունները, բնականաբար, ընթանում են հնարավորինս ձեռնտու գնի շուրջ», – ավելացրեց Բաղրամյանը։
Հիշեցնենք` «Գազպրոմի» հետ ունեցած պայմանագրով, «Գազպրոմի»` Հայաստանում գործող դուստր կազմակերպությունը` «Գազպրոմ Արմենիան», 1000 խմ գազի դիմաց սահմանին վճարում է 150 դոլար։
Հայաստանի շարքային սպառողը գազի դիմաց վճարում է 290 դոլար, ոչ ապահով խավերը` 80 դոլար, իսկ 10 000 խմ-ից շատ սպառող խոշոր բաժանորդները վճարում են 242 դոլար, ջերմոցային ու վերամշակող ընկերությունները` 212 դոլար։
