ԵՐԵՎԱՆ, 19 դեկտեմբերի — Sputnik. «Հրապարակ» թերթի տվյալներով`այս օրերին տարբեր երկրներից Հայաստան են ժամանել մեծ թվով քրեական հեղինակություններ, հիմնականում՝ Ռուսաստանից։ «Նրանք եկել են մասնակցելու քրեական հեղինակություն Արմեն Կանևսկոյի՝ Արմեն Հարությունյանի մահվան հերթական տարելիցին, որը երեկ էր՝ դեկտեմբերի 18-ին»,–գրում է թերթը։
Օրաթերթը հիշեցնում է, որ անցյալ տարի ևս մի քանի տասնյակ քրեական հեղինակություններ եկել էին Հայաստան։ «Հեղափոխությունից հետո ևս, փաստորեն, այս ավանդույթը չի խախտվում։ Թեպետ այս տարին կարող էր բացառություն լինել կամ մի քիչ այլ կերպ դասավորվեր, եթե Արմեն Կանևսկոյի եղբորը՝ Արտյոմին, դատարանը 20 մլն դրամ գրավի դիմաց հոկտեմբերի 17-ին ազատ չարձակեր»,–գրում է թերթը։
Հիշեցնենք, որ նրան կալանավորել էին պաշտոնատար անձին անձնագիր կեղծելուն դրդելու մեղադրանքով։
«Երկու օր է՝ քաղաքի էլիտար ժամանցի կենտրոնների ու թանկարժեք հյուրանոցների դիմաց կարելի է հանդիպել դրսից ժամանած հեղինակություններին սպասարկող մեքենաներին։
Քրեական աշխարհի ներկայացուցիչները երեկ այցելել են Արմեն Կանևսկոյի՝ Շահումյանի գերեզմանատանը գտնվող շիրիմին, ապա հացի նստել «Սան Լազարո» սգո սրահում, ինչպես անցյալ տարի։ Մեզ ասացին, որ մոտ 900 մարդ է մասնակցել, որոնց մեջ՝ 10 օրենքով գող։ Նրանք հանգրվանել են քաղաքի թանկարժեք հյուրանոցներում, այդ թվում՝ «Իմպերիալ» և «Մարիոթ»։ Իրենց «ախպոր» հիշատակը հարգելուց հետո նրանք այսօր-վաղը կհեռանան Հայաստանից»,–գրում է «Հրապարակը»:
