ԵՐԵՎԱՆ, 20 դեկտեմբերի – Sputnik. Հայաստանի Հանրապետության կառավարությունը որոշել է աճուրդով վաճառել ՀՀ բարձրագույն ղեկավարության ու նրանց բարձրաստիճան հյուրերի համար նախատեսված նավը։ Այս մասին որոշումն այսօր կայացվեց ՀՀ կառավարության նիստում։ Հարցն ընդունվեց առանց զեկուցման ու քննարկման։
Որոշման նախագծից պարզ է դառնում, որ 78 143 372 դրամ հաշվեկշռային արժեքով նավը սեփականության իրավունքով պատկանում է «Բարձրավոլտ էլեկտրացանցեր» փակ բաժնետիրական ընկերությանը։
Զբոսանավը նախատեսվում է վաճառել աճուրդով։ Նախնական արժեք է սահմանվել 90 915 000 դրամ շուկայական գինը:
Ըստ կառավարության ներկայացրած նախագծի` նշված զբոսանավը տեղակայված է Սևանա լճում և մինչ այժմ սպասարկել է ՀՀ բարձրագույն ղեկավարությանը և բարձրաստիճան հյուրերին՝ Սևանա լճում տարբեր միջոցառումների ընթացքում:
Կառավարության որոշման նախագծի հիմնավորման մեջ նշված է, որ զբոսանավի հետագա շահագործման անհրաժեշտությունը և նպատակահարմարությունն այլևս չկա։
