ԵՐԵՎԱՆ, 20 դեկտեմբերի — Sputnik. Ադրբեջանին սպառազինություններ առաքելը նպաստում է տարածաշրջանում անկայունությանը։ Այսօր կայացած ճեպազրույցում այս մասին ասաց Հայաստանի ԱԳՆ մամուլի քարտուղար Աննա Նաղդալյանը` մեկնաբանելով Բաքվին բելառուսական զենք վաճառելու մասին Նիկոլ Փաշինյանի բարձրացրած հարցը։
«Սպառազինությունների մրցավազքը նպաստում է տարածաշրջանի անկայունությանը։ Այն, ինչը ոմանց համար բիզնես է, մեր ժողովրդի համար մահացու գործիք է», – ասաց Նաղդալյանը։
Նրա խոսքով` տարածաշրջանում սպառազինությունների մրցավազքի հարցը միշտ գտնվում է ԱԳՆ օրակարգում։ ԵԱՀԿ նախարարական խորհրդում խնդիրը բարձրացրել է նաև ԱԳՆ ղեկավարը։ Սակայն գերատեսչությունը կոչ է անում այդ հայտարարությունները չշփոթել Հայաստանի հնարավորությունների հետ. երկրի զինված ուժերը պատրաստ են ապահովել Հայաստանի ու Արցախի անվտանգությունը։
