22:14 18 օգոստոսի 2019
Ուղիղ եթեր
  • USD475.92
  • GBP578.43
  • EUR527.46
  • RUB7.22
Հայկ Ալումյան

Մարտի 1-ը գործիք էր նախ Փաշինյանի դեմ, ապա Քոչարյանի. Ալումյանը` 0038–ի ու գեներալի մասին

© Sputnik / Aram Nersesyan ,
Հայաստան
Ստանալ կարճ հղումը
«Մարտի 1»-ի գործը (211)
316 0 0

Նախկին նախագահի փաստաբանը համոզված է, որ իր պաշտպանյալի նկատմամբ քաղաքական հաշվեհարդար են տեսնում, Մարտի 1-ի գործն էլ դարձել է գործիք։

ԵՐԵՎԱՆ, 22 դեկտեմբերի— Sputnik. Մարտի 1-ի գործը քաղաքական հաշվեհարդար իրականացնելու գործիք է։ Այս մասին այսօր լրագրողների հետ հանդիպմանը հայտարարեց ՀՀ երկրորդ նախագահ Ռոբերտ Քոչարյանի փաստաբան Հայկ Ալումյանը։

Փաստաբանը հիշեցրեց, որ քրեական գործի նյութերում ու դրանից զատ կան բազում օպերատիվ տվյալներ, որոնք կարող են օգտագործվել այս կամ այն ներկա ու նախկին պաշտոնյայի դեմ։

Քոչարյանի փաստաբանը հայտարարեց, որ մարտի 1-ի գործն այսօր ուղիղ ուղղորդվում է գործող իշխանությունների կողմից։ Նրա խոսքով` նախ գրվել է գործի սցենարը, հետո սկսել են դրա տակ հարմարեցնել ապացույցները։

«Փաշինյանը ժամանակին, երբ իր նկատմամբ դատավարություն էր ընթանում, ասում էր` ես մեղավոր չեմ, մեղավոր է ռեժիմը` նկատի ունենալով Ռոբերտ Քոչարյանին, այնուամենայնիվ դատարանը համարեց, որ ինքն է մեղավոր և ոչ միայն, այլև Ալեքսանդր Արզումանյանն ու մնացածները. մի քանի տասնյակ դատավճիռներ կան։ Երբ Փաշինյանը դարձավ վարչապետ, ու բոլոր ուժային լծակները հայտնվեցին նրա ձեռքում, հանկարծ գործը փոխվեց ու հիմա գնում է այնպես, ինչպես Փաշինյանը 2009թ–ին ասել էր»,– ասաց Ալումյանը` հավելելով, որ մարտի 1-ի 10 զոհերի սպանության բացահայտումը ոչ այսօր, ոչ էլ նախորդ 10 տարիներին այդ գործը քննողներին չի հետաքրքրում։

«Այդ օպերատիվ տվյալներն այն ժամանակ էլ, այսօր էլ ԱԱԾ–ի ձեռքում են։ Եթե նախկինում դրանք հասանելի էին Ռոբերտ Քոչարյանի համար, ապա այսօր արդեն հասանելի են նոր իշխանություններին» ,– ասաց Ալումյանը։

Բացի այդ, փաստաբանն այսօր որոշ տեղեկություններ հայտնեց 2008թ–ին ստացված օպերատիվ տեղեկություններից։

Նրա խոսքով, 2008թ–ի փետրվարի 19-ին կայացած նախագահական ընտրություններից հետո, երբ ընդդիմության առաջնորդը հայտարարեց, որ չի ընդունում ընտրության արդյունքները, և բողոքի ակցիաներ սկսվեցին Ազատության հրապարակում, սկսեցին օպերատիվ տեղեկություններ ստացվել, որ որոշ մարդիկ փորձում են բանակը ներքաշել այս գործողությունների մեջ, որպեսզի զինվորականները գան ու իրենց զենքը շրջեն իշխանությունների դեմ։

«Կային տվյալներ, որ պաշտպանության երկու փոխնախարարները բացահայտ հայտարարել են, որ միանում են ցուցարարներին, կար գործող զինվորական դատախազ, որը ցույց է անում պարոն Տեր–Պետրոսյանի հետ Ազատության հրապարակում։ Գիշեր–ցերեկ ընթանում էին ԵԿՄ բարձրաստիճան սպաների մասնակցությամբ քննարկումներ` ցուցարարներին միանալու հարցով, և Մանվել Գրիգորյանն արդեն հայտարարել էր, որ ցուցարարների հետ է։ Ստացվում էին օպերատիվ տվյալներ, որ որոշ զորամասերում արդեն աշխատանքներ են տարվում անձնակազմի հետ` ցուցարարներին միանալու հարցով։ Կային տվյալներ, որ Հատուկ գնդի 80 տոկոսը կարող էր միանալ ցուցարարներին»,– ասաց Ալումյանը` հավելելով, որ Քոչարյանի մեղադրանքի հիմքում այսօր դրված հայտնի 0038 հրամանը ուղիղ կապ ուներ հենց այդ օպերատիվ տեղեկությունների հետ և հնարավոր արյունահեղ զարգացումները կանխելու նպատակ ուներ։

«0038 հրամանն իր դերն ունեցել է, որ բանակը չի ներքաշվել այդ գործողություններին, և մինչև մարտի 1-ը այդ ամենին ծառայել է։ Մարտի 1-ի իրադարձություններն այս հրամանի հետ ընդհանրապես կապ չունեն»,– հայտարարեց փաստաբանը` նշելով, որ երբ հրամանը քննության ավարտին գաղտնազերծվի, հանրությունն առիթ կունենա համոզվելու դրանում։

Հիշեցնենք` ՀՀ 2–րդ նախագահ Ռոբերտ Քոչարյանը հուլիսի 26-ին Հատուկ քննչական ծառայություն էր ներկայացել «Մարտի 1»-ի գործով վկայի կարգավիճակով՝ հարցաքննության։ Նույն օրը նրան մեղադրանք էր առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։

Քննչական մարմինը Քոչարյանի նկատմամբ խափանման միջոց էր ընտրել կալանավորումը։

Առաջին ատյանի դատարանը Ռոբերտ Քոչարյանին կալանավորելու միջնորդությունը բավարարել էր, իսկ Վերաքննիչ դատարանը Քոչարյանին ճանաչել էր անձեռնմխելի և ազատել կալանքից:

Ավելի ուշ քրեական գործի նախաքննությունը վարող ՀՔԾ քննիչը որոշում էր կայացրել Ռոբերտ Քոչարյանի նկատմամբ խափանման միջոց ընտրել ստորագրությունը չհեռանալու մասին:

Իսկ Վճռաբեկ դատարանը փաստաբանների բողոքի հիման վրա որոշում էր կայացրել գործն ուղարկել լրացուցիչ քննության` Վերաքննիչ դատարան։

Դեկտեմբերի 7-ին Վերաքննիչ դատարան մերժել էր ՀՀ երկրորդ նախագահ Ռոբերտ Քոչարյանի պաշտպանական թիմի բողոքները և անփոփոխ թողել առաջին ատյանի դատարանի հուլիսի 27-ի որոշումը՝ համաձայն որի Ռոբերտ Քոչարյանի նկատմամբ որպես խափանման միջոց էր ընտրվել կալանավորումը:

Այս որոշման համաձայն, նույն օրը երեկոյան ՀՀ երկրորդ նախագահը կալանավորվել էր։

թեմա:
«Մարտի 1»-ի գործը (211)

Գլխավոր թեմաներ