ԵՐԵՎԱՆ, 26 դեկտեմբերի — Sputnik. Armenia ավիաընկերությունը պատրաստ է մրցել ռուսական ցանկացած ավիաընկերության հետ, բայց կարևոր է համարում ավիացիոն բոլոր նորմերի պահպանումը, որոնք գրված են Հայաստանի ու Ռուսաստանի միջև կնքված միջկառավարական համաձայնագրում։ Այս մասին այսօր լրագրողների հետ զրույցում ասաց Armenia ավիաընկերության գլխավոր տնօրեն Ռոբերտ Օգանեսյանը։
Հայաստանի ու Ռուսաստանի միջև քաղաքացիական ավիացիայի և օդային տարածքի օգտագործման մասին միջկառավարական համաձայնագրի համաձայն` երկու երկրի միջև չվերթերի ծախսերը պետք է նույնը լինեն։
«Այսօր այդ ծախսերը համարժեք չեն։ Առաջին հերթին մենք գործող իշխանությունից ակնկալում ենք, որ կհսկի պայմանագրերով ամրագրած ավիացիոն նորմերի կատարումը», – ասաց Օգանեսյանը։
Ավիաընկերության ղեկավարությունը հանդիպել է նոր իշխանության հետ, ներկայացրել քաղաքացիական ավիացիայի զարգացման իր տեսլականն ու սպասում է հաջորդ հանդիպմանը։
Իսկ «Զվարթնո՞ցը»
Օգանեսյանն ընդգծեց, որ «Զվարթնոց» միջազգային օդանավակայանի ղեկավարությունը զիջումների է գնացել օդանավերի սպասարկման սակագների հարցում. օդանավակայանը 30%–ից 50% զեղչեր է տրամադրել, բայց նույնիսկ այդ պայմաններում Երևանը չի կարողանում մրցել այլ երկրների հետ։
Նա օրինակ բերեց Երևան – Թել Ավիվ չվերթը։ Մեկ տոմսն արժի 117 դոլար, որից 46 դոլար 30 ցենտը «Զվարթնոց» օդանավակայանի սակագինն է, 42 դոլար 60 ցենտը` վառելիքի ծախսը, 20 դոլար 60 ցենտը` պետական տուրքը, 4 դոլարը` սնունդը, 31 ցենտը` օդերևութաբանական ծառայությունը և այլն։
«Թել Ավիվի դեպքում ուղևորի ծախսերը կազմում են 58 դոլար», – ասաց Օգանեսյանը։
Նա ընդգծեց, որ ավիաընկերությունը տոմսում չի ներառում անձնակազմի, թռիչքային կազմի աշխատավարձը և այլն։ Սակայն չնայած այդ ամենին, տարվա ընթացքում ավիաընկերությունը ավելի քան 3,5 զբոսաշրջիկ է Իսրայելից Հայաստան բերել։
Տարվա արդյունքը
Ավիաընկերություն արդեն երեք տարի է` շուկայում է ու կորուստներով է աշխատում։ 2018 թվականի ընթացքում 415 միլիոն դրամ հարկ է վճարել։ Այդ ընթացքում ավելի քան 10 միլիոն դոլար է ներդրվել ընկերությունում։ Սեփականատերերը հույս ունեն, որ գոնե գործունեության հինգերորդ տարում վնասը կհասցնեն զրոյի։
2017 թվականին Armenia–ում 44 աշխատակից կար, իսկ 2018–ին` արդեն 51։ Այսօր նրանք արդեն 3 լիարժեք անձնակազմ ունեն` 6 օդաչու, երեք ստաժոր, 24 բորտուղեկցորդից։
«Ավելացրել ենք չվերթերի քանակը, Լիոնի ուղղությամբ նոր չվերթ ենք բացել, հույս ունենք ամրապնդել մինչև ձմեռվա ավարտը, իսկ ամռանը շաբաթական երեք անգամ իրականացնել», – ասաց Օգանեսյանը։
2018 թվականին իրականացված չվերթերի թիվն ավելացել է 13%–ով ու կազմել 542` 2017 թվականի 480–ի փոխարեն։ Կանոնավոր չվերթերի հաշվին կրճատվել է չարտերային չվերթերի թիվը (218–ից հասել է 135–ի)։
«2017 թվականին մենք 74 120 մարդ ենք տեղափոխել, 2018–ին` 75 հազար։ Աճն ընդամենը մեկ տոկոս է», – ասաց Հովհաննիսյանը։
Նրա խոսքով` պատճառը Հայաստանի ներքաղաքական իրադարձություններն էին. ուղևորներից շատերը վերադարձնում էին տոմսերն ու նախընտրում էին երկրում մնալ։ Ուղևորահոսքի վրա ազդել է նաև վառելիքի գնաճը։
Հիշեցնենք` Armenia–ն կանոնավոր չվերթեր է իրականացնում Երևանից Վորոնեժ, Մինվոդի, Թել Ավիվ, Լիոն։
