Պետական եկամուտների կոմիտեն արդիականացրել է ավտոմեքենաների գների մասին իր բազայում եղած տեղեկատվությունը։ Նոր գներն արդեն ներառվել են հաշվիչներում ու հունվարի 1-ից մաքսազերծումներն իրականացվում են դրանց համապատասխան։ Այս մասին այսօր կառավարության նիստից հետո լրագրողներին հայտնեց ՀՀ ՊԵԿ նախագահ Դավիթ Անանյանը։
«Արդեն բավականին իջեցված գներ ենք մուտքագրել, բայց պատրաստվում ենք մի քանի ամիսը մեկ ռևիզիայի ենթարկել և թարմացնել հաշվիչում մուտքագրված գները»,– ասաց նա։
Ի դեպ, Անանյանը հայտարարեց, որ այսօր այդ ոլորտում կան կազմակերպություններ, որոնք քաղաքացիներին օգնում են կեղծել ավտոմեքենաների ինվոյսային գները։
«Ունեն կապեր արտասահմանում, նույն մեքենայի` նախորդ օրը ցուցադրված արժեքը հաջորդ օրը փոփոխված են ցույց տալիս»,– ասաց նա։
Բայց եթե ներկրողը կարողանա փաստերով ապացուցել, որ իրականում Ճապոնիայից, ասենք, 100 կամ 300 դոլարով ավտոմեքենա է գնել ու բերել Հայաստան, ՊԵԿ նախագահը խոստանում է մաքսազերծումն իրականացնել այդ գնով։
Հիշեցնենք` տվյալների արդիականացման նպատակով ՊԵԿ–ն ուսումնասիրել է ավտոմեքենաների արտահանման հիմնական երկրների շուկաներում ձևավորված գները, և արդյունքները համադրել մաքսային մարմինների տեղեկատվական բազայում առկա տեղեկատվության հետ։
Անձնական օգտագործման նպատակով ներմուծվող ավտոմեքենաների մաքսային ձևակերպումների վճարման ենթակա գումարի չափը 2019թ. հունվարի 1-ից ներկրողները կկարողանան նախապես հաշվարկել ՊԵԿ պաշտոնական կայքում տեղադրված նոր տվյալներով հաշվիչի միջոցով։
