ԵՐԵՎԱՆ, 20 փետրվարի — Sputnik. Գյուղատնտեսության նախարարության օպտիմալացումը վկայում է այդ ոլորտի նկատմամբ պետական ոչ լուրջ վերաբերմունքի մասին։ Այս մասին այսօր լրագրողներին ասաց Հայաստանի «Ագրարագյուղացիական միավորում» ՀԿ–ի նախագահ Հրաչ Բերբերյանը։
«Միայն մի բան եմ ուզում ասել այսօրվա երիտասարդ այրերին, որ մի օր կգա պատասխանատվության պահը, երբ պատասխանատվությունից խուսափելն անհնար է լինելու»,– ասաց նա։
Բերբերյանը դժգոհ է նոր կառավարության կադրերից ու նրանց աշխատանքից։
«Միջազգային տարբեր ծրագրերով մի երկու կոպեկ փող է ստացել, հիմա մի ամբողջ ոլորտ է ղեկավարում»,– ասում է նա` չնշելով կոնկրետ պաշտոնյայի անունը։
Բերբերյանի ուշադրությունից չի վրիպել նաև այն, որ նոր պաշտոնյաները սկսել են թանկարժեք կոստյումներ հագնել, ինչը, նրա համոզմամբ, կոռուպցիայի ցուցանիշ է։
Ինչ վերաբերում է գյուղատնտեսական ցուցանիշներին, Բերբերյանի խոսքով, դրանք, ինչպես նախորդ տարիներին, այնպես էլ այսօր, շարունակում են նվազել։
«Գյուղացին այսօր հսկայական սերմացուի կարիք ունի, հենց կարտոֆիլի սերմացուի։ Այս տարի կարտոֆիլի ցանքատարածություններն անցած տարվա համեմատ պակասելու են։ Անցած տարի 32 տոկոսով էին պակասել, այս տարի մի 15 տոկոսով էլի կպակասեն։ Բացի այդ, մշակողներն են թողնում, գնում Հայաստանից, որովհետև միջոց չունեն մշակելու։ Գյուղացին այսօր հասել է այն վիճակի, որ մտածում է միայն վարկերը փակելու ու Հայաստանից գնալու մասին»,– ասաց նա։
Բերբերյանի կանխատեսմամբ` 2019-ին գյուղացուն դարձյալ ոռոգման ջրի լուրջ խնդիրներ են սպասում։ Ջրամբարները կիսադատարկ են։ Անասնագլխաքանակը շարունակաբար նվազում է, բելառուսական էժան ու կասկածելի որակի մսի ներկրումն էլ` ավելանում։
Գյուղացու աշխատանքը, Բերբերյանի խոսքով, այսօր որևէ կերպ չի խրախուսվում։
«Հազիվ մի նախարարություն կար, գնում կռիվ էին անում, էդ էլ փակեցին, էլ որտե՞ղ գնան բողոքեն»,– ասաց Բերբերյանը
Հիշեցնենք` կառավարության ներկայացրած օպտիմալացման ծրագրով գյուղատնտեսության նախարարությունը միացվելու է տնտեսական զարգացման և ներդրումների նախարարությանը: Իսկ տնտեսական զարգացման և ներդրումների նախարարությունը կվերանվանվի Էկոնոմիկայի նախարարություն:
