ԵՐԵՎԱՆ, 28 փետրվարի – Sputnik. «ՎՏԲ-Հայաստան Բանկը» որոշել է 5.7 մլն դրամի համակարգիչներ ու տպող սարքեր նվիրել ՀՀ ոստիկանությանը: Կառավարությունն էլ դեմ չէ ընդունել նվերը:
Այս մասին որոշումն այսօր առանց քննարկումներ ծավալելու կայացվեց ՀՀ կառավարության հերթական նիստում:
Համակարգչային թանկարժեք տեխնիկան կտրամադրվի ոստիկանության պետական պահպանության գլխավոր վարչությանը:
Նվերն օրինականացնելու համար կառավարությունը ՀՀ ոստիկանության պետ Վալերի Օսիպյանին լիազորեց մեկամսյա ժամկետում բանկի հետ կնքել նվիրաբերության պայմանագիրը:
Իսկ նվերները, ըստ որոշման նախագծի, սրանք են` 20 համակարգիչ` Philips մոնիտորով, մկնիկով ու ստեղնաշարով, և 25 բազմաֆունկցիոնալ տպող Pantum սարքեր:
