ԵՐԵՎԱՆ, 1 մարտի — Sputnik. «Մարտի 1-»-ի քրեական գործի շրջանակներում ՀՔԾ-ն արգելանք էր դրել ՀՀ պաշտպանության նախկին նախարար Սեյրան Օհանյանի կենսաթոշակային հաշվեհամարի վրա։ Այս տեղեկությունը հրապարակել է «Փաստինֆո» կայքը:
Լուրի հրապարակումից հետո Sputnik Արմենիային հետ զրույցում Հատուկ քննչական ծառայությունից տեղեկացրին, որ իրականում նախկին նախարար Սեյրան Օհանյանի կենսաթոշակային հաշվի կալանքը բանկային տեխնիկական թերության հետևանք է եղել։ Ավելին, այս պահին տեխնիկական խափանումը վերացված է, իսկ կալանքը` հանված։
Հիշեցնենք, որ, «Մարտի 1»–ի գործի շրջանակներում Սեյրան Օհանյանին մեղադրանք է առաջադրվել ՀՀ քրեական օրենսգրքի 300.1-րդ հոդվածի 1- ին մասով՝ սահմանադրական կարգը տապալելու համար։ Վերջինս հայտարարել է, որ չի ընդունում առաջադրված մեղադրանքը։
Հիշեցնենք նաև, որ Սեյրան Օհանյանը 2008 թվականին զբաղեցնում էր ՊՆ Զինված ուժերի գլխավոր շտաբի պետի պաշտոնը:
