ԵՐԵՎԱՆ, 14 մարտի — Sputnik. Մարտի 1-ի գործով հարցաքննվել է ՀՀ Սահմանադրական դատարանի անդամ Ֆելիքս Թոխյանը։ Այս մասին հայտնում է «Ժողովուրդ» օրաթերթը։
«Հենց նա էլ ՍԴ-ում եղել է 2008թ. նախագահական ընտրությունների արդյունքների բողոքարկման գործով զեկուցող դատավորներից մեկը: Իսկ ահա ՍԴ այն ժամանակ նախագահ Գագիկ Հարությունյանը, որ հիմա ԲԴԽ նախագահն է, այս գործով չի հարցաքննվել»,– գրում է թերթը:
Թերթին նաև մանրամասներ են հայտնի դարձել Թոխյանի հարցաքննությունից։ Ըստ պարբերականի` նրան ուղղված հիմնական հարցերը վերաբերել են ՍԴ նախկին անդամ Վալերի Պողոսյանի նկատմամբ ՀՀ նախագահի աշխատակազմի նախկին ղեկավար Արմեն Գևորգյանի կողմից միջնորդավորված ճնշումներին:
«Այդ մասին Վ. Պողոսյանը պատմել էր ամերիկացի դիվանագետների, և որը բացահայտվել էր Վիքիլիքսյան հրապարակումների արդյունքում, երբ գաղտնազերծվեց ամերիկացի դիվանագետների նամակագրությունը: Այս դրվագով քրեական գործը հարուցված է արդարադատությանը խոչընդոտելու մեղադրանքով, մեղադրյալն էլ Արմեն Գևորգյանն է»,– հիշեցնում է թերթը` հավելելով, որ Թոխյանը էական ցուցմունքներ չի տվել` հիմնականում ասել է, որ տեղյակ չէ և չի հիշում:
