ԵՐԵՎԱՆ, 18 մարտի — Sputnik. Հայաստանը ժամանակակից և գործուն հակահրդեհային համակարգի կարիք ունի, որը կիրառելի է նաև օնլայն տիրույթում։ Մարտի 17–ին Խոսրովի արգելոցում այս մասին հայտարարեց Հայաստանի բնապահպանության նախարար Էրիկ Գրիգորյանը հրդեհ հանգցնելու գործիքներ և սարքավորումներ հանձնելու արարողության ժամանակ։
ՄԱԿ–ի Զարգացման ծրագրի «Հայաստանում կլիմայի փոփոխության ազդեցության մեղմումը անտառային և դաշտային հրդեհների կառավարման ներուժի զարգացման միջոցով» ծրագրով երեկ ՀՀ արտակարգ իրավիճակների և բնապահպանության նախարարություններին փոխանցվեցին 360 հրշեջների համար ձեռք բերված գործիքներն ու սարքավորումները։ Ծրագիրն իրագործվում է Ռուսաստանի ֆինանսական աջակցությամբ, եռամյա բյուջեն կազմում է 1 միլիոն դոլար։
«Մենք հասկանում ենք, որ նորարարական տեխնոլոգիաների կիրառմամբ կարելի է ավելի քիչ ռեսուրներ օգտագործել և ավելի մեծ արդյունքի հասնել հրդեհները հանգցնելու գործընթացում։ Հույս ունենք ծրագրի ավարտին հասնել հաջողության», – ասաց նախարարը։
ԱԻՆ ղեկավար Ֆելիք Ցոլակյանն էլ նշեց հակահրդեհային ժամանակակից համակարգերի կարևորությունը` հավելելով, որ հաճախ, հաշվի առնելով Հայաստանի տեղանքի լանդշաֆտը, հենց ձեռքի տեխնիկան է ավելի արդյունավետ լինում։ Նա հիշեցրեց, որ ընդամենը մեկ ամիս առաջ անտառային հրդեհ է եղել, և հրդեհային ուսապարկերի ու լապտերների խսիտ անհրաժեշտություն է ծագել։
Ծրագրի ղեկավար Վարդան Մելիքյանի խոսքով` լավ կլիներ, եթե նախարարություններին տրամադրված տեխնիկան երբեք պետք չգար։ Նա չափազանց կարևոր համարեց հրդեհների կանխարգելման աշխատանքը և այդ համատեքստում նշեց հասարակությանը բռնկումների պատճառների մասին իրազեկելու անհրաժեշտությունը։
Հայաստանում Ռուսաստանի դեսպան Սերգեյ Կոպիրկինը սարքավորումներ տրամադրելը համարում է հանրապետության հետ ռազմավարական համագործակցության համեմատաբար ոչ մեծ, բայց կարևոր մասը։ Նա նշեց, որ դա միակ ծրագիրը չէ, որն իրագործվում է Հայաստանում ռուսական ֆինանսավորմամբ։ Նրա խոսքով` դրանցից յուրաքանչյուրը կարևոր և կոնկրետ ներդրում է երկրի տարբեր շրջաններում բնակչության կյանքի բարելավման գործում։
2015թ–ին Ռուսաստանի կառավարությունը ՄԱԿ–ի Զարգացման ծրագրին տրամադրել է ավելի քան 5 միլիոն դոլար «Գյուղական համայնքների զարգացման ինտեգրացված աջակցություն. համայնքների կայունության ամրապնդում» հնգամյա նախագծի շրջանակում` Հայաստանի Տավուշի մարզի 45 սահմանամերձ գյուղերի զարգացման համար։