ԵՐԵՎԱՆ, 21 մարտի — Sputnik. Հավաքական անվտանգության մասին պայմանագրի կազմակերպության իրավական կարգավիճակի մասին համաձայնագրում առաջարկվող փոփոխություններն ընդունելուց առաջ կառավարությունը մտադիր է դիմել Սահմանադրական դատարան։ Այս մասին որոշումն այսօր ընդունվել է ՀՀ կառավարության հերթական նիստում։
Բանն այն է, որ 2018թ. նոյեմբերի 8-ին, Աստանայում կայացած ՀԱՊԿ անվտանգության խորհրդի նիստում փոփոխություններ էին առաջարկվել «2002թ. հոկտեմբերի 7-ի՝ ՀԱՊԿ իրավական կարգավիճակի մասին» համաձայնագրում։
Դրանով առաջարկվում է ՀԱՊԿ Գլխավոր քարտուղարին, նրա տեղակալներին ու նրանց ընտանիքների անդամներին օժտել դիվանագիտական անձեռնմխելիությամբ։
«Եթե Գլխավոր քարտուղարը, Գլխավոր քարտուղարի տեղակալները, նրանց ընտանիքները՝ իրենց հետ ապրող անդամները, գտնվելու վայրի պետության քաղաքացիներ չեն, արտոնություններից և անձեռնմխելիություններից օգտվում են այնքան, որքան «Դիվանագիտական կապերի մասին» 1961 թվականի ապրիլի 18-ի Վիեննայի կոնվենցիայով նախատեսված է դիվանագիտական գործակալի և նրա ընտանիքի անդամների համար»,– ասված է որոշման նախագծի հիմնավորման մեջ։
Ընդ որում, այս փոփոխությունները ներկայացվում են որպես ՀԱՊԿ գործունեության արդյունավետության առավել բարձրացմանը միտված քայլ։
Ընդունելով արձանագրությամբ առաջարկված փոփոխությունը` կառավարությունը միաժամանակ որոշում կայացրեց դիմել Սահմանադրական դատարան ` դրանում ամրագրված պարտավորությունների սահմանադրականությունը որոշելու նպատակով։
Միայն ՍԴ–ի կողմից Սահմանադրությանը համապատասխան որակվելուց հետո կառավարության օրենսդրական նախաձեռնությունը կներկայացվի Ազգային ժողովի հաստատմանը:
Սահմանադրական դատարանում կառավարության ներկայացուցիչ նշանակվեց ՀՀ արտաքին գործերի նախարարի տեղակալ Շավարշ Քոչարյանը։