ԵՐԵՎԱՆ, 22 մարտի – Sputnik. Երևանի քաղաքապետ Հայկ Մարությանն այսօր Երևանի ավագանու նիստի ժամանակ դիմեց բոլոր քաղաքացիներին և հորդորեց մասնակցել մարտի 23-ին ծրագրված համապետական շաբաթօրյակին։
«Ես ամբողջ ընտանիքով դուրս եմ գալու առավոտից, նախ կսկսեմ բակի հարակից տարածքներից, այնուհետև այլ հանրային վայրերում կլինենք, որտեղ, այսպես ասած, կպահանջվի մեր աշխատուժը: Սա ոչ միայն մաքրման աշխատանք է, այլ նաև ընտանիքի անդամների և ընկերների հետ շփվելու լավ առիթ»,-ասաց նա:
Ըստ Մարությանի` քաղաքապետարանն ու մյուս գերատեսչություններն իրենց վրա են վերցրել հանրային տարածքները, բայց բակային տարածքներ մուտք չենք գործելու:
«Սա արդեն մեր բնակիչների վրա կմնա: Այնպես որ, խնդրում եմ ակտիվ մասնակցել»,– ասաց քաղաքապետը։
Մարությանը նշեց, որ քաղաքապետարանի ֆեյսբուքյան էջերին հետևելով՝ քաղաքացիները կիմանան, թե որտեղ են կոնկրետ մաքրության աշխատանքներ արվելու:
«Մաքրության պարագաները կարող եք բերել, եթե չունեք, մենք կտրամադրենք, այնպես որ, հավաքվեք, դուրս եկեք, մաքրեք»,-ասաց նա։
Մարտի 20-ին ՀՀ տարածքային կառավարման և զարգացման նախարար Սուրեն Պապիկյանը հայտնել էր, որ մարտի 23-ին համապետական շաբաթօրյակ է անցկացվելու։
Նա տեղեկացրել էր, որ համապետական շաբաթօրյակի ժամանակ 6 աղբանոցներ և 447 աղբակույտեր կփակվեն, կմաքրվեն մի շարք տարածքներ: Շաբաթօրյակին ակնկալվում է 125-150 000 քաղաքացու մասնակցություն։