ԵՐԵՎԱՆ, 29 մարտի – Sputnik. Հայաստանի ֆուտբոլի հավաքականի անդամներ Կարեն Սարգսի Իսրայելյանը, Աշոտ Սուրենի Սարդարյանը, Սարգիս Հրաչյայի Բալոյանը, Նորայր Ռուստամի Մամեդով-Ասլանյանը, Վարդան Գրիգորի Պողոսյանն ու Գեղամ Գագիկի Ղադիմյանը կազատվեն պարտադիր զինվորական ծառայությունից:
Այս մասին որոշումը կառավարությունը կայացրեց այսօրվա նիստում։
«Կարեն Իսրայելյանը, Աշոտ Սարդարյանը, Սարգիս Բալոյանը, Նորայր Մամեդով-Ասլանյանը, Վարդան Պողոսյանը և Գեղամ Ղադիմյանը հանդես են գալիս ֆուտբոլի Հայաստանի Հանրապետության ազգային հավաքական թիմում, աչքի են ընկնում արդյունավետ խաղով, և Հայաստանի Հանրապետության սպորտի և երիտասարդության հարցերի նախարարությունը կարևորում է նրանց մասնակցությունը ֆուտբոլի ազգային հավաքականի 2019 թվականի Եվրոպայի առաջնության ընտրական խաղերին»,- նշված է ՀՀ կառավարության ընդունած որոշման մեջ:
Որոշման ընդունումը պայմանավորված է այն հանգամանքով, որ այս ֆուտբոլիստներին մինչ այդ տարկետում էր տրվել մինչև 2018 թվականի ձմեռային զորակոչը։ Եվ քանի որ նրանց 27 տարին լրանում է 2019 թվականին, անհրաժեշտություն է առաջացել նրանց ազատել պարտադիր զինվորական ծառայությունից։
