ԵՐԵՎԱՆ, 29 մարտի — Sputnik. Ազգային ժողովում բողոքի ակցիա իրականացնող մաքրուհիների գերակշիռ մասը համաձայնել է համագործակցել «Քլիներս» ընկերության հետ։ Sputnik Արմենիայի հետ զրույցում այս մասին ասաց ԱԺ–ի հետ պայմանագիր կնքած «Քլիներս» հիմնադիր տնօրեն Գարուշ Պապիկյանը։
ԱԺ մաքրուհիները մարտի 22-ին բողոքի ակցիա էին կազմակերպել` դժգոհելով իրենց առաջարկվող նոր աշխատանքային պայմաններից։ Նրանց խոսքով` նախկինում իրենց ստացած 65–67 հազար դրամ աշխատավարձի փոխարեն, իրենց հիմա առաջարկում են 45 հազար դրամ աշխատավարձ։
«Ազգային ժողովի 60 աշխատակիցներից 51–ն արդեն իսկ դիմում են գրել, որպեսզի ապրիլի 1–ից դառնան «Քլիներսի» աշխատակից։ Այսօր առավոտյան կրկին հանդիպել եմ նրանց հետ, զրուցել ու ասել, որ իրականում ճիշտ չի լինի, որ երկու ժամ աշխատողն էլ, ութ ժամ աշխատողն էլ նույն կերպ վարձատրվեն»,–ասաց Պապիկյանը։
Պապիկյանը հիշեցրեց, որ ԱԺ–ում մաքրությունն ապահովում են 60 աշխատակից, որից 44–ն աշխատանքի են գնում առավոտյան ժամը 07։00-09։00–ը, իսկ 16 աշխատակից էլ 09։00-18։00–ն են աշխատում։ Ի սկզբանե մինչև երեկո աշխատող մաքրուհիները որևէ դժգոհություն չեն ունեցել, քանի որ նրանց աշխատավարձը չի փոփոխվել, նրանք նորից ստանալու են նույն` 80 000 դրամ աշխատավարձը։ Բողոքի ակցիա էին իրականացնում առավոտյան ժամը 07։00-09։00–ին աշխատանքի գնացող մաքրուհիները, որոնց աշխատավարձը 65 000–ից դարձել է 40 000 դրամ։
Ինչ վերաբերվում է «Քլիներսի» հետ համագործակցելուց հրաժարվող ԱԺ–ի նախկին 9 մաքրուհիներին, ապա Պապիկյանի խոսքով` ինքն առաջարկով է հանդես եկել։ «Ես ասել եմ, որ կա՛մ իմ կադրային ռեզերվում գտնվողներից 9–ին կգործուղեմ ԱԺ, կա՛մ էլ այդ ինը հոգու աշխատանքը կբաշխվի մյուսների վրա, ու, բնականաբար, աշխատավարձը նույնպես կվերանայվի»,–ասաց Պապիկյանը։
Հիշեցնենք, որ ԱԺ–ի մաքրուհիներից մեկն ապրիլի 22-ին բողոքի ակցիայի ժամանակ վստահեցրել էր, թե իրենց խաբել են, ի սկզբանե չեն ասել, որ գործատուն և աշխատանքի պայմանները պիտի փոխվեն, իսկ իրենք հայտարարված և անցկացված մրցույթի մասին բավական ուշ են իմացել։
«Քլիներս» մասնավոր ընկերությունը ԱԺ–ի մաքրությունը կիրականացնի ապրիլի 1-ից։
