ԵՐԵՎԱՆ, 2 ապրիլի — Sputnik. ՀՀ կառավարության շենքի մոտ հաջորդ բողոքի ակցիան Կարեն Դեմիրճյանի անվան Մարզահամերգային համալիրի աշխատակիցներն են պլանավորում իրականացնել: Հայտնում է «168 ժամ»–ը։
Պատճառն աշխատավարձերի ուշացումն է։ ՄՀՀ նոր տնօրինությունն էլ միլիոնների պարտք է կուտակել։
Թերթի տեղեկություններով` պարտքի պատճառով համալիրն անցած շաբաթ նույնիսկ հոսանքազրկվել էր, գազամատակարարումն էլ` դադարեցվել։ Այս ամենի պատճառը պետական բյուջեից համալիրին հատկացվող գումարների ուշացումն է։
«2019 թվականի պետական բյուջեով «Կարեն Դեմիրճյանի անվան մարզահամերգային համալիր» ՊՈԱԿ-ի համար բյուջեից նախատեսված է հատկացնել 182 մլն 781.2 հզ դրամ, ընդ որում, այս գումարը որպես պահպանման ծախս է նախատեսված »,– գրում է թերթը` հավելելով, որ տարվա երկրորդ ռեռամսյակն է մեկնարկել, բայց այդ գումարը մինչ օրս չի փոխանցվել։
Մարզահամերգային համալիրի տնօրենը «168 ժամի» հետ զրույցում հաստատել է այդ տեղեկությունը, բայց մեկնաբանություն տալուց խուսափել։ ՀՀ ֆինանսների նախարարությունում ևս հաստատել են և պատճառաբանել փաստաթղթավորման գործընթացով։
Ըստ Ֆիննախի, Պետգույքի կառավարման կոմիտեից ԿՀՀ–ի ֆինանսավորման հայտ դեռ չի ներկայացվել։
