ԵՐԵՎԱՆ, 14 ապրիլի — Sputnik. Հայաստանյայց Առաքելական Ս. Եկեղեցին տոնում է Ծաղկազարդը։ Մեծ պահքի ավագ շաբաթին նախորդող այս տոնը խորհրդանշում է Քրիստոսի հաղթական մուտքը Երուսաղեմ։
Տոնի առթիվ բոլոր առաքելական եկեղեցիներում մատուցվում է սուրբ պատարագ։
Ծաղկազարդի խորհրդանիշը ձիթենու և ուռենու ճյուղեր են, որոնք մարդիկ իրենց հետ բերում են եկեղեցի և օրհնելուց հետո տանում տուն: Դրանց վերագրվում էր բարիքի, առատության, պտղաբերության հմայական զորություն։
Այս օրը հայոց եկեղեցիները զարդարվում են ուռենու ճյուղերով, առավոտյան կատարվում է ժամերգություն և Անդաստանի կարգ, որից հետո օրհնված ճյուղերը բաժանվում են հավատացյալ ժողովրդին, որոնք պահվում էին մինչև հաջորդ Ծաղկազարդ։
Անդաստանի արարողությամբ օրհնվում են աշխարհի չորս կողմերը, մասնավորապես, Հայոց Հայրապետությունը, հայրենիքը, քաղաքներն ու գյուղերն իրենց բնակիչներով, վանքերը, արտերը և տարվա պտղաբերությունը։ Այն տարվա մեջ կատարվում է 25 անգամ։
Ծաղկազարդի երեկոյան կատարվում է Դռնբացեքի արարողությունը, որի ընթացքում, «Բաց մեզ, Տէր զդուռն ողորմութեան» շարականի ներքո բացվում են եկեղեցիների խորանների վարագույրները՝ խորհրդանշելով Տիրոջ երկրորդ գալուստը, աշխարհի վախճանը և Վերջին դատաստանը։ Ժամանակին այս արարողությունը կատարվել է եկեղեցու փակ դռան առջև։ Կարդացվում է «Երգ Երգոցի» մի հատվածն ամբողջությամբ: Ծաղկազարդի օրը Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի տնօրինությամբ հռչակված է որպես մանուկների օրհնության օր, քանի որ Տիրոջ՝ Երուսաղեմի տաճար մտնելու ժամանակ մանուկներն աղաղակում էին՝ ասելով. «Օրհնությո՜ւն, Դավթի որդուն»։
Ծաղկազարդի տոնից հետո՝ երկուշաբթիից մինչև Սուրբ Հարության տոնը կոչվում է Ավագ շաբաթ:
