ԵՐԵՎԱՆ, 17 ապրիլի — Sputnik, Արմենուհի Մխոյան. Հայաստանը նույնը չէ, ինչ 10 կամ 20 տարի առաջ էր, լրիվ փոխվել է, երկիրն առաջ է գնում։ Այս կարծիքին է Դեպի Հայք» կամավորական ծրագրով արդեն մեկ ամիս Հայաստանում գտնվող սփյուռքահայ Գևորգ Գրիգորեանը։
Գևորգը ծնվել ու մեծացել է Սիրիայի Դամասկոս քաղաքում, սակայն պատերազմը սկսվելուց 2 տարի անց` 2013–ին, ընտանիքի հետ տեղափոխվել է Լիբանան: Լիբանանում միայն մեկ տարի մնալուց հետո, ընտանիքը կրկին տեղափոխվում է, այս անգամ` Կանադա: Մայր հայրենիք գալու երազանք երիտասարդը միշտ է ունեցել, այդ իսկ պատճառով «Դեպի Հայք» ծրագրի շրջանակներում Հայաստանում կամավորություն անելու մասին իմանալուն պես անմիջապես մասնակցության հայտ է ուղարկել:
Արդեն 1 ամիս է Գևորգը Հայաստանում է ապրում, նախ՝ Գյումրիում, ապա Երևանում: Sputnik Արմենիայի հարցին, թե չի կարոտում իր հայրենիքը՝ Սիրիան, երիտասարդը շտապում է ուղղել՝ հայրենիքս այստեղ է: Ծրագրի պահանջից ելնելով՝ Գևորգը պետք է վերադառնա Կանադա, բայց անկեղծանում է՝ ուզում է Հայաստանում ապրել: «Շատ եմ մտածում Հայաստան գալու և այստեղ ապրելու մասին, հատկապես հիմա, երբ եկա ու երկար մնացի: Դեռ 2 ամիս էլ Երևանում կամավորություն պիտի անեմ ու հնարավորություն դեպքում, հետո անպայման էլի կգամ: Ամեն ինչ կանեմ դրա համար»,-ասում է Գևորգը:
Ի դեպ, երիտասարդի համար սա Հայաստան առաջին այցը չէ: «Փոքր էի, 2003 թվականն էր՝ 16 տարի առաջ, որ եկանք Հայաստան: Շատ բան չեմ հիշում այդ այցից, բայց տեսնում եմ, որ հիմա ավելի զարգացած ու աշխույժ է Հայաստանը: Հուսով եմ, որ այս Հայաստանը առաջ է գնալու»:
Կանադայի, Սիրիայի, Լիբանանի և Հայաստանի մասին խոսելիս` երիտասարդը մի բան է առանձնացնում՝ Հայաստանի ժողովուրդն այլ է: «Հայաստանում մարդիկ շատ մտերիմ են ու հարազատ։ Հատկապես, Կանադայում այդպես չէ՝ այնտեղ ամեն մեկն իր կյանքով է ապրում: Բայց միայն ժողովուրդը չէ, որ ինձ համար Հայաստանը յուրահատուկ է դարձնում, ի վերջո, այստեղ, երբ գլուխդ դնում ես բարձին, գիտես, որ քո հայրենիքն է»:
Գևորգը դեռ չի որոշել ընտանիք Հայաստանում է կազմելու, թե դրսում, բայց մեկ բանում վստահ է՝ սփյուռքում գտնվող բոլոր հայերը, թեկուզ մեկ անգամ, պետք է գան ու սեփական աչքով տեսնեն իրենց հայրենիքը՝ չհավատալով այն չարախոսներին , որոնք պնդում են թե Հայաստանում ամեն ինչ վատ է: